Кеден жеңілдіктері

Кеден жеңілдіктері– кеден төлемдерінен босату. Мұндай босатуға белгіленген орыннан басқа жерде немесе кеден органдарының жұмыс уақытынан тыс мерзімде сақталғаны, ресімделгені үшін төленетін төлемдер жатпайды. Қазақстанда кеден жеңілдіктері атап айтқанда мыналарға: 1) шет мемлекеттердің ресми пайдалануға арналған тауарларды елге әкелетін немесе елден әкететін дипломатиялық және консулдық өкілдеріне; аталмыш өкілдіктердің басшылары мен дипломатиялық қызметкерлеріне, олардың бірге тұратын отбасы мүшелеріне, шет елдердің дипломатиялық және консулдық шабармандарына, парламент және үкімет делегацияларына және өздерінің жеке басының пайдалануына арналған тауарларды елге әкелуші және елден әкетуші шетелдіктердің кейбір санаттарына беріледі. Бұл адамдардың жеке басылық жолжүктері кеден заңнамасында көзделген жағдайлардан басқа реттерде кеден тексеруінен босатылады; 2) дипломатиялық және консулдық өкілдіктердің бастапқы кезде үй жабдығына қажетті тауарлар әкелетін әкімгерлік-техникалық қызметкерлеріне және олардың бірге тұратын отбасы мүшелеріне (бұл қызметкерлер елде тұрақты тұрмайтын болса) беріледі. Шет мемлекеттермен арнаулы келісім негізінде оларға дипломатиялық қызметкерлер мен адамдардың осындай санаттарына берілетін кеден жеңілдіктері қолданылуы мүмкін.