Күләй Сағындыққызы Ермағамбетова

Ермағамбетова Күләй Сағындыққызы - Қызылорда облысының ардагерлер кеңесінің төрәғасының орынбасары.

Өмірбаяны

Ермағамбетова Күляй 1947 жылы 20 наурыз айында Орынбор облысы, Адамау ауданында айында дүниеге келген. 1964 жылы Қызылордадағы М. Маметова атындағы педагогикалық училищесіне түсіп, 1968 жылы балабақша тәрбиешісі мамандығы, 1976 жылы Қызылордадағы Н.В Гоголь атындағы педагогикалық институтының орыс тілі және әдебиет мамандығы бойынша бітірген.

1968 - 1979 жылдар аралығында Қызылорда қаласының мектепке дейінгі мекемелерінде тәрбиеші, әдіскер болып еңбек еткен.

1979 жылдан бастап 2006 жылға дейін облыстық білім беру басқармасында мектепке дейінгі тәрбие мен бастауыш және орта кәсіптік білім саласын басқарды.

2005 жылы зейнетке шығып, 2005-2006 жыл аралығында келісім-шарт бойынша облыстық білім басқармасында мектепке дейінгі тәрбие саласын басқарды.

2006-2010 жылдар аралығында облыстық білім басқармасы жанында білім беру ұйымдарының облыстық ардагерлер кеңесінің төрайымы және «Облыстық білім беру ұйымдарының Ассоциациясы» қоғамдық бірлестігі төрағасының орынбасары болып еңбек етті.

2010 жылдың қыркүйек айынан бастап Қызылорда облыстық ардагерлер кеңесі төрағасының орынбасары болып қызмет етуде.

1979-2006 жылдар аралығында Қызылорда облысының мектепке дейінгі тәрбие саласының дамуына өз үлесін қосты. Облыс бойынша балабақшалар ашу, әсіресе ауылдық жерлердің бұрынғы совхоздардың бөлімшелерінде, сонымен қатар қалада қазақ тілінде жұмыс жасайтын балабақшалар ашу, балабақшалар жүйесін қалыптастыра отырып қыруар шараларды іске асырды.

Халықтың тілін, салтын, дәстүрін бойына сіңірген ұрпақ тәрбиелеу үшін балабақшаларда ұлттық ән-би «Шаңырақ» атты эстетикалық клубы,«Әкелер», «Ақ әже» мектептері мен «Ұшқын», «Талапкер», атты байқауларды ұйымдастырып, жыл сайын өткізуді дәстүрге айналдырған.

Осындай игі істер мен оң тәжірибе Қазақстан Республикасы Білім Министрлігі тарапынан қызу қолдау тауып, 1995 жылы «Қазақ балабақшаларының дамуындағы ғылыми-әдістемелік негіздер мен жаңашылдық практикасы» тақырыбында білім Министрлігі шығармашылық семинарын Қызылорда облысының балабақшалар базасында өткізді.

ҚР Білім министрлігі республикалық шығармашылық семинардың жұмысын жоғары кәсіби деңгейде ұйымдастырылғаны жайлы және облыстық білім басқармасының сол кездегі бастығы Ә.Муслимовке алғыс беріліп, Қызылорда облысының қазақ балабақшаларының тәжірибесін республика көлемінде мектепке дейінгі мекемелерде енгізу және пайдалану жайында арнайы бұйрық берді. Білім министрлігінің мектепке дейінгі тәрбие бөлімі республикалық семинардың қорытындысымен облыстық білім басқармасының бастығы Ә.Мүслімовке арнайы хат жолдап, ол хатта К.Ермағамбетованы семинарды жоғары кәсіби деңгейде дайындағаны үшін арнайы марапаттауды сұраған болатын. Және орта мектептерде оқушылардың «Жас ұрпақ» қоғамдық бірлестігінің дамуына, қалыптасуына өз үлесін қосты.

2006-2010 жылдар аралығында зейнетке шыққанан кейін де қоғамдық жұмыстармен белсене айналысты. Облыстық білім ұйымдарының ардагерлер кеңесінің төрайымы болып, облыс бойынша білім саласындағы мекемелерде бастауыш ардагерлер ұйымдарын құру, олардың жүйесін қалыптастыру, ардагерлер ұйымдарына бөлме беру және бөлмелерді қажетті құрал - жиһаздармен жабдықтау, ардагерлерді есепке алу жөнінде оң істер мен игі дәстүрлер қалыптастырды.

Облыстық ардагер ұстаздардың шығармашылығын айқындау, дамыту, жастарға үлгі ету мақсатында «Парасатты әже - 2008», «Ардагер - өнері 2008», «Ардагер ұстаздар мүшәйрасы - 2009», облыстық байқауларын ұйымдастырды.

2010 жылдан бастап Қызылорда облыстық ардагерлер кеңесі төрағасының орынбасары болып, бұл қызметте де мемлекеттік органдармен, қоғамдық ұйымдармен бірлесе отырып бастауыш ардагерлер ұйымдарының жүйесін қалыптастырды. Сонымен қатар Ұлы Жеңістің 70 жылдығына орай «Қызылордалық қаһармандар» атты кітаптің редакциялық алқасында болып, кітаптың шығуына өз үлесін қосты.

Білім беру саласындағы еңбектері үшін 1983 жылы «Қазақ ССР халық ағарту ісінің озық қызметкері» төс белгісімен, 2007 жылы «Ы. Алтынсарин» медалімен, облыс әкімінің және облыстық маслихаттың Құрмет грамотасымен, 2 рет облыс әкімінің алғыс хатымен, Қазақстан Республикасы білім Министірлігінің Құрмет грамотасымен марапатталған. «Астана - 10жыл», «Қазақстан Республикасы Тәуелсіздігінің 20 жылдығы», «Қазақстан Республикасы Тәуелсіздігіне 25жыл» және «Қызылорда облысына 70 жыл» мерекелік медальдарының иегері.

2007 жылы Қазақстан Республикасы ардагерлер ұйымының 20 жылдығына орай өткізілген Республикалық байқауға қатысып, жүлделі орынды иеленіп, «Ардагерлер ұйымы» республикалық қоғамдық бірлестігі Орталық кеңесінің Құрмет грамотасымен, сонымен қатар қоғамдық жұмыстағы белсенділігі үшін Қазақстан Республикасының ардагерлер ұйымы Орталық кеңесінің Құрмет грамотасымен және «Құрмет белгісі» төсбелгісімен марапатталды.

2011 жылы облыс әкімінің Алғыс хатымен және облыстық білім басқармасының «Қызылорда облысының білім беру ісінің үздігі» төс белгісімен марапатталды.

2015 жылы «Ерен еңбегі үшін» мемлекеттік наградасына және «Еңбек ардагері» медаліне ие болды. Жанұялы, марқұм жолдасымен бірге 41 жыл бойы өмір сүріп, 3 қызды өсірген ана, 6 немересін тәрбиелеп отырған бақытты әже.

Марапаттар

• «Қазақ ССР халық ағарту ісінің озық қызметкері» медалі, 1983 ж.
• «Ы.Алтынсарин» медалі, 2007 ж.
• Облыстық мәслихат және облыс әкімінің грамотасы
• Облыс әкімінің екі мәрте мақтау хаты
• ҚР Білім Министрлігінің құрмет грамотасы
• «Астана - 10 жыл», «Қазақстан Республикасы Тәуелсіздігінің 20 жылдығы», «Қазақстан Республикасы Тәуелсіздігіне 25 жыл», «Қызылорда облысына 70 жыл» мерекелі медальдар
• «Құрмет белгісі» медалі және ҚР ардагерлер орталығы ұйымы Кеңесінің Құрмет грамотасы
• «Қызылорда облысының білім беру ісінің үздігі» медалі, 2011 ж.
• «Ерен еңбегі үшін» мемлекеттің марапат, «Еңбек ардагері» медалі, 2015 ж.