Лапараскопия

Лапараскопия (грек. lapra — ішкі қуысы және ...скопия) — ішкі қуыстарындағы органдарды және оларда пайда болған ауруларды анықтауға арналған зерттеу әдісі. Лапараскопия — хирургияда жиі қолданылады. Оны іске асыру техникалық жағынан көп қиыншылық тудырмайды және ішкі қуыстарда пайда болған сырқаттарды анықтауда жоғары нәтиже береді. Лапараскопия ғылыми-тәжірибелік зерттеу жұмыстарының нәтижесінде ауруды емдеу әдісіне де айналып отыр. Мысалы, қазіргі кезде Лапараскопия негізінде іске асырылып отырған видеоэндохирургия технологиясы кеңінен игеріліп келеді (Лапараскопиялық операциялар). Мұнда алдымен белгілі нүктеден арнайы шприцпен (Жанэ шприці) іш қуысына 2500 — 4500 см3 шамасында ауа жіберіледі (пневмоперитансум). Одан соң арнайы нүктеде (Кальк нүктесі) ұзындығы 1,5 — 2,0 см-дей тері қабаты тілінеді де, ішкі қуыстардың басқа қабаттарын троакармен теседі. Троакардың стилеті алынған соң, түтікше арқылы ішкі қуыстарға лапараскоп енгізіледі де, ішкі қуыстардағы органдарды маман көзбен көріп, белгілі бір ретпен қарап шығады. Зерттеу барысында олардағы өзгерістер, аурудың түрі, т.б. жайттар анықталады. Күдікті жерлерден тіндер, сұйықтықтар алынып (биопсия, экссудат) лабораторияға жіберіледі. Лапараскопиялық әдіс, көбінесе, наркоз арқылы жүргізіледі. Лапараскопия аяқталған соң аспап, троакар түтікшесі арқылы енізілген ауа тысқа шығарылады, ал тері жарасы жібек жіппен тігіледі.