Латыштың қызыл қоңыр сиыры

Латыштың қызыл қоңыр сиыры — асыл тұқымды сүтті ірі қара. Латвияда жергілікті сиырларды англер және даниялық қызыл сиырлардың бұқаларымен шағылыстыру арқылы шығарылған. Түсі қызыл. Дене тұрқы созылыңқы. Басы мен мойыны ұзын, терісі жұқа әрі қатпарлы. Арқасы түзу, бөксе жағы жалпақ, құйымшағы ұзын, сирақтары жіңішке, кеудесі кең келеді. Желіні үлкен. Бұзауының туғандағы орташа салм. 26 — 29 кг, алты айлығында 150 — 160 кг, 12 айлығында 240 — 250 кг, 16 айлығында қашарлары 340 — 360 кг-ға жетеді. Сиырларының орташа тірілей салмағы 500 — 600 кг, ал бұқаларынікі 850 — 1000 кг. Орташа сүттілігі 3500 — 5000 кг, ал сүтінің майлылығы 3,9 — 4,2%. Қырдың қызыл сиырымен туыстас. Қазақстанға 1950 — 60 ж. әкелініп, асыл тұқымды мал өсіру жоспарына кірген (1968). 1980 — 90 ж. Латыштың қызыл қоңыр сиырының саны 200 мыңнан асты. Негізінен Қостанай, Ақмола, Қарағанды, Батыс Қазақстан, т.б. облыстарда өсіріледі.