Львовтық - Варшавалық мектеп

Львовтық - Варшавалық мектеп

Львовтық - Варшавалық мектеп — 1-ші және 2-дүниежүзілік соғыстар аралығында Варшава, Львов және Краков қалаларында жұмыс істеген поляк логиктері мен философтар тобы. Негізін қалаушы — К.Твардовский, өкілдерінің қатарында Я. Лукасевич, Т. Котарбиньский, К. Айдукевич, С. Лесьневский, Л. Хвистек, А. Тарский, т.б. болды. Львовтық - Варшавалық мектепте филосфия жағынан алуан түрлі бағыттар (Т.Котарбиньскийдің материализмінен Я.Саламухи мен Ю.Бохеньскийдің неотомизміне дейін) қамтылды.

Львовтық - Варшавалық мектеп өкілдерінің көпшілігіне ортақ нәрсе:

• Иррационализмді жоққа шығару, математикалық логика аппаратының көмегімен дәстүрлі рационализмнің негізгі идеялары мен принциптерін анықтау;
• Ғылыми пікірлер логикасын дәл зерттеуге ұмтылу;
• Логикалық семантикаға ден қою.

Львовтық - Варшавалық мектеп өкілдері математикалық логиканы, математика негіздерін, дедуктивтік ғылымдар методологиясын, логика тарихы мен логикалық семантиканы дамытуға айтарлықтай үлес қосты. Мысалы, Лукасевич, М.Байсберг, Я.Слупецкий, т.б. алғашқылардың бірі болып көп мәнді логика мен модальдық логиканы талдады, ал Хвистек, Лесьневский, В.Собоцинский, Тарский, т.б. металогиканың негізгі ұғымдарын зерттеді. Львовтық - Варшавалық мектеп өкілдері қатынастар логикасы мәселелерімен, жиындар теориясын аксиомалаумен, атауларды есептеумен, т.б. шұғылданды.

Дереккөздер

• Қазақ энциклопедиясы