Мелиорациялық сорғы станциясы

Мелиорациялық сорғы станциясы — мелиорациялық жүйеде халықаралық құрылыс нормалары мен қағидалары бойынша жобаланатын, салынатын және пайдаланылатын суармалау сорғы станциясы. М.с.с. су берудегі сенімділігі жағынан үш категорияға бөлінеді (қ. Қосалқы сорғы агрегаттары). Сорғы станциясындағы сорғы агрегаттарының саны өнімғе байланысты міндетті түрде мына тұрғыда қабылданады: 1 м³/с дейін 2—4 дана, 1—5 м³ аралығында 3—5 дана, 5-30 м³/сек-тын аралығында 4-6 дана, 30 м³/сек-тан жоғары 5—9 дана. Егер сорғы станциясында бірнеше текті және әр түрлі арынды сорғылар және өндірісте игерілмеғен құрал-жабдықтар орнатылса, онда агрегаттар санын көбейтуге болады. Ал сорғы станциялары суды ашық суқоймаларға берген жағдайда агрегаттар саны біршама азайтылуы мүмкін, сөйтіп ашық суқоймалар суды реттеп, сорғыны бір тәулікке дейін тоқтатуға мүмкіндік береді. Қосалқы агрегаттардың саны сенімділік категориясы бойынша қабылданады (қ. Қосалқы сорғы агрегаттары). Мелиорациялық сорғы станциялары өнімділігіне қарай: кіші — Q ≤ 1,0 м³/сек; орташа — Q = 1—10 м³/сек; күрделі — Q = 10 - 100 м³/с; бірегей — Q ≥ 100 м³/сек болып, ал арынына қарай: Н < 20 м — төмен арынды; Н == 20—60 м — орташа арынды; Н ≥ 60 м — жоғары арынды болып бөлінеді. Еліміздегі мелиорациялық жүйелерде мелиорациялық сорғы станцияның аталған түрлері көп кездеседі.