Нефрит (химия)

Нефрит – силикаттар класы, амфиболдар тобының минералы. Химимялық формуласы: Ca2(Mg,Fe)5[Sі4O11]2(OH,F)2. Актинолит және тремолиттің тығыз, аса тұтқыр, жасырын кристалды, ширатыла, айқын талшықты бітіскен түрінде кездеседі. Түсі көбіне жасыл, қоңырқай жасыл келеді, жарықты құбылтады. Оңай өңделеді, теп-тегіс болып жылтырайды; қаттылығы Моос шкаласы бойынша 5,5 – 6,5, тығыздығы 2,9 – 3 г/см3. Кристалдық тақтатастарда, гидротермальдық және метаморфизмге шалынған негізді жыныстарда эпидот, хлорит, цоизит, тальк, т.б. минералдармен бірге кездеседі. Қойтас және малтатастар күйінде кездесетін Нефритті аллювий шөгінділерінен өндіреді. Тас дәуірінде, әсіресе неолитте алғашқы адамдар қару жасауға жиі пайдаланған. Нефрит Шығыс елдерінде жоғары бағаланады, одан Әмір Темірдің құлпытасы тұрғызылған. Бағалы әшекей тас ретінде зергерлік істе қолданылады.^[1]