Орынбасар Жaлжанов

Орынбасар Жaлжанов (1934 жылы туған, Маңғыстау ауданы Ортаеспе ауылы) – мал дәрігері. Гурьев (қазіргі Атырау) ауыл шаруашылық техникумын бітірген (1958). 1954 жылы Кеңес армиясы қатарына шақырылып, азаматтық борышын өтеген. 1958 – 85 жылы Таушықта, Маңғыстау ауданы ұжымшарында учаске меңгерушісі, бас мал дәрігері, 1985 – 95 жылы Маңғыстау ауданы малдәрігерлік мекемесінің бастығы болды. Қазақстан КП ОК-нің Құрмет грамотасымен (1977) марапатталған. Тигендегі Құлбарақ әулие кесенесінің тұрғызылуына басшылық жасап, Өзбекстанның Хиуа қаласындағы Құлбарақ әулиенің "Бас әулие" деп аталатын мүрдесіне белгі орнатқан. Орынбасар Жалжанов ауданның мәдениет саласында да ерекше көзге түсіп, көп еңбек сіңірді. Ол "Еңлік-Кебек" трагедиясындағы" Еспенбет би, Ғабит Мүсіреповтың "Қозы Көрпеш-Баян сұлу" пьесасындағы Қодардың, Әбділда Тәжібаевтың "Жалғыз ағаш орман емес" пьесасында Телғара бастықтың рөлдерін шеберлікпен ойнап, көрерменнің жүрегіне жол тапты. Маңғыстау аудандық Мәдениет үйінің драма ұжымы 1962 жылы Республикалық байқауда алматылықтарды таң қалдырып, сол жылы "Халық театры" деген атақ алды. Бұл ұжымның жемісті болуына Орынбасар Жалжановтың сіңірген еңбегі мол еді. Орынбасар Жалжанов "Бурылтай" әнін ерекше шабыттана шырқайтын. 2008 жылы 14 ақпанда дүниеден өтті. Орынбасар Жалжанов туралы 2010 жылы "Нұрлы әлем баспасынан Әзірайжан Қонарбаевтың "Қара шаңырақтың киелісі" атты кітап жарық көрді.