Радиотаратқыш құрылғы

Радиотаратқыш құрылғы — қоректендіру көзінің энергиясын радиожиілік тербелісіне өзгертуге және ондай тербелісті ашық кеңістік арқылы ақпарат тарату мақсатымен басқаруға арналған радиотехникалық жабдықтар кешені. Тарататын ақпарат түріне қарай радиотаратқыштар байланыстық, радиохабар таратушы, алыстан басқарушы болып бөлінуі мүмкін.

Тарататын толқын түріне қарай біржолақты жиіліктік, дискретті жиіліктік және импульстік радиотаратқыштар деп бөлінсе, жұмысшы жиіліктері диапазонына қарай — ұзын толқынды, қысқа толқынды, ультра-қысқа толқынды радиотаратқыштар деп бөлінеді. Сондай-ақ антеннаға беретін қуатына қарай шағын қуатты (0,1 кВт-қа дейін), орташа қуатты (0,1-10 кВт), қуатты (10-500 кВт), аса жоғары қуатты (500 кВт-тан жоғары) радиотаратқыштар болады.

Тиісті қуат алу үшін арнайы үйлестіруші құрылғы арқылы бір антеннаға екі радиотаратқыш параллель қосылуы мүмкін. Сондай-ақ қабылдау орнында өріс кернеулігін арттыру мақсатымен бір бағыттағы бөлек екі антенна арқылы екі радиотаратқыш синхронды жұмыс істеуі де мүмкін.

Негізгі бөліктері: айнымалы немесе тұрақты ток энергиясын радиожиілікті тербеліс энергиясына өзгертетін генератор, қоздырылатын тербеліс параметрлерінің бірін (амплитудасын, жиілігін немесе фазасын) пайдалы сигнал заңына сәйкес өзгертетін модулятор, энергия көзі.