Сақтық күзет

Сақтық күзет (Сторожевое охранение) — қарсыластардың жер үсті шабуылынан қорғану мақсатында, орналасқан жерде ұйымдастырылатын әскер күзетінің бір түрі. Сақтық күзет органдары: күзет жасағы,күзет заставасы және күзет посты. Сақтық күзетінің негізгі міндеті — қарсыласты дер кезінде байқау, күзететін әскерге ол жөнінде ескерту, олардың жазылуы мен ұрысқа кіруін қамтамасыз ету. Сақтық күзетіне тағайындалған бөлімшелерге (күзет жасақтары мен заставаларына) қорғаныс жолағы белгіленеді, қарсыластардың шабуылына қарсы тұру үшін бекініс орны дайындалады.

Сақшы

Сақшы (Часовой) — өзіне тапсырылған постыны күзету және қорғау жөніндегі жауынгерлік міндетті орындайтын қарулы күзетші. Қарулы күштердің гарнизондық және күзет қызметінің жарғысына сәйкес ол тек күзет бастығына, оның көмекшісіне және күзетшілерді бөлуші әскери қызметкерге бағынады. Сақшының қызметіне байланысты қойған талабы бұлжытпай орындалады. Жарғы талаптарына сай ол тиісті жағдайда күзет орнына қауіп төнсе, қару қолдануға ерікті. Сақшының күзет орнын тастап кетуіне, күзетте тұрғанда ұйықтауына, отыруына, біреумен сөйлесуіне, тамақ ішіп, шылым шегуіне, көңілін басқа жайттарға аударуына болмайды. Сақшы тек қарауыл бастығының, оның көмекшісінің, өзінің жұмысқа тартушысының және тексеруге келген адамдардың сұрақтарына ғана жауап беруі тиіс.