Саңылаулы проектор

Саңылаулы проектор - проекциялаушы сәулелер жарық сезгіш материалға тар саңылау арқылы өтетін проектор. Саңылау камера объективінің фокальдық жазыктығында, жарық сезгіш материалдың алдында орналасқан. Саңылаудың ұзындығы 2,5—5,0 мм, ені 0,5— 1,0 мм. Аэрофотосуретті проекциялау үшін оған координаталық осьтердің бірін бойлай өз жазықтығында ілгерілемелі жүріс береді, сонда проектордың кассетасында орналасқан жарықсезгіш материалға саңылаудың мөлшеріне сәйкес әр сәт сайын элементар аудан проекцияланады. Ал аэрофотосурет үзіліссіз қозғалыста болғандықтан, қозғалыс бағытында ені саңылаудың ұзындығына сәйкес келетін бір маршрут проекцияланады. Егер сканирлеу, мысалы, х осіне параллель маршрутпен жүргізілсе, онда осы жолдың бүкіл ұзындығы бойынша проекцияланғаннан кейін, аэрофотосурет саңылау ұзындығына сай у осінің көлемі бойынша жылжиды және кері бағытта қозғалады, бұл уақытта шектес маршрут проекцияланады. Осылай аэрофотосурет толық проекцияланғанша жалғасады. Мұндай проекциялауды, әдетте, дифференциалды өзгерту деп атайды. Саңылаулы проектор дербес қолданылмайды, оны фотограмметриялық аспаптардың кешенінде немесе құрамдас белік (саңылаулы фототрансформатор) ретінде пайдаланады немесе қажет кезінде қосалқы кұрылғы (стереограф) ретінде қолданады.