Синтездік майлар

Синтездік майлар – жағар майлар, гидравликалық сұйықтар және жылу тасығаштар ретінде қолданылатын органикалық қосылыстар. Синтездік майлар ретінде синтездік көмірсутектер, эфирлер, галоген көмірсутектер, полиалкилен гликолдар пайдаланылады. Синтездік көмірсутектер олефиндерді (этилен, пропилен т. б.) полимерлеу не ароматты көмірсутектерді (бензол, ксилол т. б.) алкилдеу арқылы алынады. Эфирлер (күрделі эфирлер) негізінен бір, екі негізді қышқылдарды бір және көп атомды спирттермен әрекеттестіру арқылы алынады. Галоген көмірсутектер – сутек атомы фтормен не хлормен алмасқан көмірсутектер. Полиалкилен гликольдар әр түрлі полигликольдар мен олардың эфирлерінен алынады. Синтездік майлар жоғары температурада майлау материалдары ретінде, авиация двигательдерінде тағы басқа өнеркәсіп салаларында кең пайдаланылады.