Сот өкілеттігі

Сот өкілеігі – заңмен айқындалатын сот билігін атқарушы ретіндегі сот құқықтары мен міндеттерінің жиынтығы. Адамды қылмыстың жасалуына айыпты деп тануға және оған жаза тағайындауға, адамға медициналық сипаттағы мәжбүрлеу шараларын қолдануға не мәжбүрлеу жолымен тәрбиелік ықпал ету шараларын қолдануға соттың ғана құқығы бар, жоғары тұрған сот төмен тұрған сот шешімінің күшін тоқтатуға немесе оны өзгертуге құқылы. Қылмыстық іс жүргізудің сотқа дейінгі сатыларында сот ҚҚЖК-ге сәйкес жағдайлар мен тәртіп бойынша қылмыстық із кесу органының шешімдеріне жасалған шағымдарды қарауға құзыретті. Егер сотта істің қаралуы кезінде қылмыс жасауға ықпал еткен жағдайлар, азаматтардың құқықтары мен бостандықтарының бұзылуы, сондай-ақ алдын ала тергеу барысында немесе істі төменгі тұрған соттың қарауы кезінде жол берілген басқа да заң бұзушылықтар анықталған болса, сот қажетті шаралар қабылдауды талап ететін заң бұзушылықтың аталған жағдаяттары мен фактілеріне тиісті ұйымдардың, лауазымды адамдардың немесе басқару міндеттерін орындайтын адамдардың назарын аударатын жеке қаулы шығаруы мүмкін. Егер анықталған құқық бұзушылықтар заңға сәйкес әкімшілік жауапкершілікке тартуды қажет ететін болса, онда сот қылмыстық іс бойынша шешім шығарумен бірге, Қазақстан Республикасының “Әкімшілік құқық бұзушылықтар туралы” кодексіне сәйкес осы іс бойынша айыптау үкімі шығарылған адамдарды қоспағанда, осы құқық бұзушылыққа кінәлі жеке және заңды тұлғаларға әкімшілік жаза қолдануға құқылы.