Тамырсүйгіш полипорус

Тамырсүйгіш полипорус (Polyporus rhizophilus) - базидиомицеттер класы, полипорус туысына жататын саңырауқұлақ. Шығыс Қазақстан , Қарағанды , Ақтөбе облыстарында кездеседі. Жемісті денесі қалың етті қалпақшадан және денесінің дәл ортасында орналасқан аяқшадан тұрады. Қалпағы жалпақ диаметрі 1-4см, қалыңдығы 0,7-4 мм, дөңгелек ортаңғы бөлігі ішіне қарай ығысқан,тегіс не майда, түссіз қабыршақты. Ашық, сарғыш қоңырқай түсті, кепкен кезде сынғыш келеді. Қалпақша жиегі өткір және аса айқындалмаған қалақшалы болады. Саңылау тесіктері бұрышты эллипс тәрізді. Аяқшасының ұзындығы 1-2,5 см, ені 2-5(7-8)мм, тығын тәрізді немесе сүректенген , тегіс, ақшыл түсті,қалпағына бекіген түсті жуандау келген қоңырқай қара түсті. Ағаштарда және бұталарда тіршілік ететін саңырауқұлақтардың басқа түрлерінен ерекшелігі –шөптесін астық тұқымдас өсімдіктермен(ши, бозшалғын,бидайық,боз, қарашағыр,т.б.) селбесе өседі. Жеуге жарамсыз. Т.п. өте сирек кездесетін саңырауқұлақ, сондықтан қорғауға алынып, Қазақстанның «Қызыл кітабына енгізілген.

Дереккөздер

«Қазақстан» Ұлттық энциклопедия. /Бас ред.Б.Аяған. 8 том. Алматы: «Қазақ энциклопедиясы», Алматы, 2006.