Тасыбаев Сейітжан

ТАСЫБАЕВ Сейітжан (1.3.1937 жылы туған, Талас ауданы Ақтөбе ауылы) – зоотехник, ауыл шаруашылық өндірісін ұйымдастырушы. Алматы малдәрігерлік-зоотехникалық институтын бітірген (1959). 1959 – 1968 жылдары Талас ауданының «Бостандық» кеңшарында зоотехник, бас зоотехник. 1968 – 1996 жылдары Сарысу ауданындағы «Түгіскен» кеңшарының директоры болды. Осы жылдары шаруашылықтағы қаракөл қойының тұқымы асылдандырылып, одан алынатын елтірінің сорттылығын ең жоғары деңгейге жеткізуге, ет мөлшерін көбейтуге қол жеткізілді. Мал шаруалышығын аса білгірлікпен жүргізудің, үнемі сұрыптап отырудың нәтижесінде «Қаракөл қойының түгіскендік типі» атты жаңа қой тұқымы пайда болды. Осы үшін 1989 жылы Бүкілодақтық өнеркәсіп к-тінің авторлық куәлігі берілді. Медальдармен марапатталған. 1996 жылы «Қазақстан Республикасына еңбек сіңірген қызметкер» құрметті атағы берілді.