Целурозаврлар

Целурозаврлар(Coelurosaurіa) — тераподалар отряды тармағына жататын жойылып біткен бауырымен жорғалаушы. Целурозаврлар триас, бор кезеңдерінің орта шенінен белгілі. 10 тұқымдасы, 60-қа жуық туысы анықталған. Денесінің ұзындығы 25 см-ден 6 м-ге жеткен. Бас сүйегі онша үлкен емес және төмен орналасқан. Көпшілік түрінде тістері ұсақ, сойдақ тістері нашар жетілген немесе өзгеріске ұшыраған; араларында тіссіз түрлері де болған. Кейбір түрлерінде қармалағыш алдыңғы аяқтары ұзын. Целурозаврлардың кейбір түрлері (мыс., орнитомимдер) сыртынан қарағанда жүгіргіш құстарға (түйеқұстарға) ұқсас болған. Бұлар құрлықта тіршілік еткен жыртқыштар. Бірақ эволюция даму барысында кейбір Целурозаврлар нағыз жыртқыш жануарлық қасиетінен айырылып, жануарлармен де, өсімдіктермен де қоректенген. Кейбір зерттеушілер, Целурозаврларды құстардың арғы тегі деп есептейді.

Дереккөздер

«Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 жыл. ISBN 5-89800-123-9, XVIII том