Шешуші кері байланысты жүйе

Шешуші кері байланысты жүйе (орыс. Системы с решающей связью). Шешуші кері байланыс жүйесінде берілген хабардың дұрыс екенін қабылдау орнында белгілі бір қабылданған ереже тексеріп, нәтижесінде дұрыс немесе қате деген шешім шығарады. Дұрыс болса, кері байланыс арнасымен растайтын, ал қате болса қайта беруді сұрайтын команда жіберіледі. Қабылдау орнындағы тексеру әдісіне байланысты шешуші кері байланысты жүйе әр символды жекежеке тексеретін немесе комбинацияны түгелдей тексеретін болып бөлінеді. Символ бойынша тексеретін әдісте әр символдың шекті мәндеріне сәйкес келмегендері өшіріліп, хабар беруші орынға "өшірілді" деп, сәйкес келгеңдерін "өшірілген жоқ" деп команда беріледі. Мысалы, қабылданған символдың мәні жоғарғы шектен жоғары болса, " 1" деп алынып, ал төменгі шектен төмен болса, "0" деп, егер екі ортасында болса, онда өшіріледі. Комбинация бойынша қайталанатын жүйеде берілетін хабардың едөуір бөлігі бірден беріледі. Қабылдау орнында жадқа сақтайтын құрылғы комбинациялардың барлығын, яғни әрбір кодалық комбинацияларды дербес тіркегішке жазып алады. Содан кейін барлық кодалық комбинациялар өздеріне белгіленген тіркегіштерді толтырып, ал қате қабылданған кодалық комбинациялар өшіріліп, оларға тиіс тіркегіштер толтырылмай қалады. Содан соң кері байланыс арнасымен қате қабылданған кодалық қомбинациялардың адресі беріледі. Хабар беруші орында осы комбинация қайталап беріледі. Сөйтіп, барлық кодалық комбинациялар қатесіз қабылданып болғаннан кейін тіркегіштердің барлығы да толтырылып, содан соң қабылданған хабардың бөлігі ақпарат қабылдаушыға беріледі.