Шүйке

Шүйке – есуге, иіруге алдын ала дайындалған жүн шумағы. Ол ұзындығы бір қарысқа жуық таяққа не басқа затқа созыла жинастырылған мал жүнінің жіптік топтамасы. Иіруге арналған шүйкені жіңішке етіп созады да, ұршық мұрындығына іліндіреді, сонда жіпті мейлінше ұзын етіп иіруге мүмкіндік туады. Жіптің қалыңдығы болашақта жасалынатын бұйымдарға (кілем, алаша, т.б.) байланысты. Шүйке үзілмесе, жіп те берік болып иіріледі. Арқан, бау секілді күрделі заттарға арналған шүйке жіп созбасы қалыңдау жасалынады. Арқан шүйкелердің үш тінінен есіледі, бірақ оны өте берік жасау үшін кейде төрт-бес тіннен де ширатады. Шүйкеге жіп не арқан сынды заттар берік болуы үшін ешкі қылы, қодас түбіті, т.б. қосылуы мүмкін.

Сілтемелер

"Қазақ Энциклопедиясы", 9 том