Қаназ Молдахмет

Қаназ Молдахмет (23.2. 1942 жылы туған, Арал ауданы Бекбауыл станциясы) – жазушы. Қазақстан Жазушылар Одағының мүшесі (1980 ж.). ҚР Денсаулық сақтау ісінің үздігі (1998 ж.), Алаш әдеби сыйлығының (2016 ж.)және Ғабдол Сланов атындағы сыйлықтың (2019 ж.) лауреаты. Шымкент педагогика институтының филология факультетін бітірген (1963 ж.). 1963 – 67 жылдары Қазалы аудандық орта мектепте мұғалім, 1967 – 69 жылдары «Ленин туы» газетінде бөлім меңгерушісі, 1969 – 74 жылдары Қазалы аудандық партия комитетінің нұсқаушысы, ауданы кәсіподақ комитетінің төрағасы қызметтерін атқарған. 1978 – 85 жылдары «Жалын» баспасында редактор, бөлім меңгерушісі, 1992 жылдан «Денсаулық» журналында бөлім меңгерушісі, 1993 жылдан бас редакторы. Алғашқы шығармалары 1970 жылы жариялана бастады. Қаназдың ауыл адамдарының тұрмыс-тіршілігі, замандастарының ой-арманы, адамгершілік мәселелері туралы жазылған «Сонар» (1973 ж.), «Арна» (1978 ж.), «Ақ тайлағым-ай» (1980 ж.), «Құм ойнау» (1984 ж.), «Армандай алыс жағалау» (1988), «Жаңбырлы жал» (1991 ж.), «Қияндағы күн нұры» (1993 ж.), «Жанқожа» (2001 ж.), «Чика ‒ Дабылдың баласы» (2003), «Кек» (2013) атты кітаптары, «Сырдария кітапханасы» сериясымен 2 томдық шығ. жин. (2009) жарық көрген. «Чика – Дабылдың баласы» (1991 ж.), «Жер кіндігі» (1975 ж.) повестері үшін жасөспірімдер мен балаларға арналған үздік шығармалардың республикалық жабық бәйгесінде жүлде алған. Орыс жазушыларының (В.Карпов, Е.Пелин, В.Распутин) шығармаларын қазақ тіліне тәржімалаған. Жекеленген туындылары орыс, грузин, өзбек тілдеріне аударылған.Қаназдың еліміз тәуелсіздік алғаннан кейінгі шығармашылығы - Халық батыры Жанқожа Нұрмұхаммедұлының өнегелі өмірі мен өшпес ерлігіне арналған. Осы тақырып аясында "Кек" атты киноповесті, «Жанқожа» атты үш актілі тарихи драмасы, сондай-ақ, «Ел қорғаны – Ер Жәкем» атты іргелі еңбегі (С.Қалуовпен бірге), «Жанқожа Нұрмұхаммедұлы» (2014 ж.) атты жинағы жарияланған..«Құрмет» орденімен (2017), бірнеше медальмен марапатталған. Арал (2007 ж.) және Қазалы (2012 ж.) аудандарының құрметті азаматы.