Қасымхан Сейітханұлы Бегманов

Қасымхан Сейітханұлы Бегманов
Туған күні	20 қыркүйек 1958 (1958-09-20) (65 жас)
Туған жері	Түркістан облысы, Кентау қаласы
Азаматтығы	КСРО  Қазақ КСР  Қазақстан
Ұлты	Қазақ
Мансабы	ақын, журналист, этнограф
Шығармашылық жылдары	1978 - осы уақыт
Жанры	Поэзия
Шығармалардың тілі	қазақ және орыс тілі
Дебюті	Бастау жыр жинағы (1980)
Марапаттары	Құрмет ордені Қазақстанның еңбек сіңірген қайраткері

Қасымхан Сейітханұлы Бегманов (20 қыркүйек 1958 жыл Түркістан облысы Кентау қаласы) — қазақстандық ақын, журналист, этнограф. Қазақстанның еңбек сіңірген қайраткері, Қазақстанның Жастар Одағы сыйлығының және халықаралық Алаш әдеби сыйлығының иегері, Қазақстан жазушылар одағы ның мүшесі.

Білімі

• Түркістан қаласына қарасты Бабайқорған орта мектебін (1975),
• Қазақ политехникалық институтын (Алматы қаласы, 1980) машина жасау мамандығы бойынша бітірген.

Қызмет жолы

• 1980-1982 жылдары Шымкент қаласындағы троллейбус паркінде мастер, эксплуатация бөлімінің бастығы, техника қауіпсіздігі жөніндегі инженер.
• 1982-1987 жылдары Шымкент облысы атқару кабинетінде жауапты қызметкер.
• 1987-1998 жылдары Түркістан қалалық мәдениетін бөлімінің меңгерушісі, Шымкент қалалық атқару комитетінің аға реферанті, «Жалын» журналының жауапты хатшысы, Қазақстан жазушылар одағы хатшысының орынбасары. Қазақстан жазушылар одағы жанындағы әдебиетшілердің ассоциациясының бас директоры, Қазақстан үкіметі Премьер-министрінің кеңсесінде бас маман, референт, аға референт.
• 1998-2000 жылдары Қазақ мәдениет және өнертану ғылыми-зертхана институты директорының орынбасары.
• 2000 жылдан - Тұран Әлем Банктің баспасөз қызметіндегі жетекшісі.
• 2000 жылдан - республикалық ұлттық-этнографиялық «Дәстүр» журналының бас редакторы.

Шығармашылық жолы

Қасымхан Бегманов - Қазақстан Журналистер одағының, Халықаралық жазушылар мен публицисттер қауымдастығының, Бас редакторлар клубының мүшесі, ЮНЕСКО-ның аясындағы Әлемдік өнер және мәдениет Академиясының тұрақты мүшесі. Əлемдік өнер жəне мəдениет Академиясының ғылым докторы. ҚР Жазушылар одағының Басқарма мүшесі, ҚР Жазушылар Одағы поэзия кеңесі төрағасының орынбасары.

Қасым Аманжоловтың 90 жылдығына орай өткізілген республикалық жыр мүшәйрасының бас жүлдегері, Түркістан қаласының 1500 жылдығына арналған халықаралық жыр мүшәйрасының бірінші орын иегері. Түркістан, Кентау қалаларының құрметті азаматы. Тұңғыш жыр кітабы «Бастау» деген атпен студент кезінде «Жалын» баспасынан шыққан.

Қырғызстанның «Улуу Тоолор» баспасынан 2017 жылы «Гүл көктем» деген атпен қырғыз тіліндегі жыр кітабы қырғыз ақыны Марқабай Ааматовтың аудармасымен жарық көрді. 2017 жылы «Күреңбел» кітабы Татарстанның «Илһам нәшрияты» атты баспасынан ақын Рафис Құрбанның аудармасымен татар тілінде жарық көрген. ХХХVII халықаралық поэзия конгресінің аясында моңғол тілінде «Алаш орда гэрээслэл» атты кітабы шығып, «Word poetry 2017» атты ағылшын тіліндегі антологияға өлеңдері енген.

Бір поэмасы мен бірнеше өлеңдері Ресейдің белгілі ақыны Михаил Синельниковтің аудармасымен «Семиречье» атты кітабына шыққан. Өзбекстан Республикасы мемлекеттік сыйлығының екі мәрте лауреаты, жазушы Насыр Фазыловтың алғы сөзімен, Қарақалпақстанның халық ақыны Мұзафар Ахматтың аудармасымен Ташкент шаһарында «Әдебиет ұшқындары» баспасынан 2017 жылы «Саогинич» деген атпен жыр кітабы өзбек тілінде жарық көрді.

«Мұстафа Шоқай жолымен» атты төрт бөлімнен тұратын тарихи деректі фильмі еліміздегі орта мектептерде тарих пәніне қосымша электрондық оқулық ретінде бағдарламаға енген. Елге кең тараған көптеген ән-өлеңдерінің авторы. Шығармашылық өмірбаяны ұлттық және қазақ әдебиеті энциклопедияларында, топтама жырлары қазақ поэзиясының антологиясында жарық көрген. Ақын өлеңдері сондай-ақ, орта мектеп оқулықтарының қазақ, өзбек тілдерінде шыққан хрестоматияларына енген.

Кітаптары

• «Бастау» (1980);
• «Қарашық» (1990);
• «Бесіктен бейітке дейін» (1997);
• «Сағыныш» (2000);
• «Ол көктем оралмайды» (2006);
• «Менің Түркістаным» (2008);
• «Ақ жаңбырлар әуені» (2010);
• «Күреңбел» (2014);
• Екі томдық шығармалар жинағының (2008);
• «Этнографпен әңгіме» (бірінші басылым) (2010);
• «Салты мықтының – халқы мықты» (екінші басылым, 2011);
• «Мұстафа Шоқай жолымен» атты екі томдық бірінші рет (2012);
• «Дәстүр: кеше, бүгін, ертең» атты төрт томдық (2017).

Басқа тілдерде

Ақынның шығармалары орыс, түрік, өзбек, қырғыз телдеріне аударылған.

Марапаттары

• 1990 жылы Қазақстан Жастар одағы сыйлығының лауреаты;
• 2003 жылы Халықаралық «Алаш» әдеби сыйлығының лауреаты;
• 2009 жылы «Құрмет ордені» нің иегері;
• 2017 жылы «Ұлт қайраткері» құрметті атағының иегері;
• 2007 жылы «Алаш арыстарының ізбасары» құрметті атағының иегері;
• Әлемдік өнер және мәдениет Академиясының ғылым докторы;
• Түркістан, Кентау қалаларының құрметті азаматы.
• 2016 жылы «Қазақстанның еңбек сіңірген қайраткері» құрметті атағымен марапатталған.