Құмар Кенжеғалиев

Кенжеғалиев Құмар – 1935 жылы 15 наурызда Гурьев қаласының маңында туған.

1944 жылы Гурьев қаласындағы Орджаникидзе атындағы мектептің бірінші класына барып, орта мектепті 1954 жылы бітірді. 1954-1959 жылдар аралығында Алматы қаласындағы Қазақ Мемлекеттік университетінде журналистика факультетінде оқиды.

1959 жылдан Гурьев облыстық «Социалистік құрылыс» (бүгінгі «Атырау") газеті редакциясында — алғашқыда әдеби қызметкер, кейін ауыл шаруашылығы бөлімінің меңгерушісі, редактордың орынбасары, ал 1978 жылдан 1987 жылға дейін бас редактор болып жұмыс істеді.

Қазақстан Компартиясы облыстық комитеті бюросының шешімімен 1987 жылдың наурызында «Баспа, полиграфия және кітап саудасы» облыстық басқармасының бастығы қызметіне ауыстырылды. Бұл басқарма 1988 жылы облыстық «Полиграфия» бірлестігі болып қайта құрылды. Осыған орай бірлестіктің бас директоры болып тағайындалды.

1995 жылы 60 жасқа толуына байланысты республика әлеуметтік қамсыздандыру министрлігі «Қазақстан Республикасына ерекше еңбегі сіңген» деген зейнеткерлік куәлік беріп, республикалық дәрежедегі зейнетақы тағайындады. 1998 жылы 20 сәуірде өз өтінішімен қызметтен босап, зейнеткерлік демалысқа шықты.

Облыстық газет редакциясында жұмыс істеген жылдар ішінде баспасөзде көп жылдар бойы белсенді қызмет атқарғаны үшін үш мәрте (1985, 1983, 1973 жылдары) Қазақ ССР Жоғарғы Кеңесінің құрмет грамотасымен, бірнеше медальдармен марапатталды. Төрт мәрте Қазақстан Компартиясы Гурьев облыстық комитетінің мүшесі, үш мәрте облыстық кеңестің депутаты, бір рет қалалық кеңестің депутаты болып сайланды.