Құрылымдық-фациялық белдем

Құрылымдық-фациялық белдем — ұзақ геологиялық кезеңде қалыптасатын және геологиялық даму тарихы анық ажыратылатын ірі құрылымдық бірлік.

Геосинклиналдық аудандарда байқалатын Құрылымдық-фациялық белдемдердің дамуы антиклиналдық, синклиналдық белдемдердің, аса ірі жарылыстардың әр түрлі тектоникалық облыстардың өзара түйісу аралықтарының қалыптасуы мен дамуына байланысты. Құрылымдық-фациялық белдемдер жер қыртысының белгілі өңіріндегі физикалық-географиялық жағдаймен және шөгінділер жиынтығының, магмалық әрекеттердің тектоникалық құрылымның ерекшеліктерімен, тектоникалық даму режимімен сипатталады.

Осы ерекшеліктер ірі тектоникалық құрылымдардағы түрлі тау жыныстарында кентас минералдарының түзілуіне және бір қабатқа шоғырлануына жағдай туғызады. Геосинклиналдық облыстардағы ірі тектоникалық құрылымдардың жаралуы мен дамуына себепші болатын Құрылмдық-фациялық белдемнің өзі де үлкенді-кішілі құрылым түзілудің, кен жаралудың, магматизмнің бірнеше сатыларынан өтеді. Осындай көп сатылық қатпарлы облыстар шегіндегі кен белдеулерінің кезектесуіне және Құрылмдық-фациялық белдемдердің әбден қалыптасқан немесе дамуы аяқталмаған түрлерінің бөлінуіне себепші болады.