Әскери бөлім

Уикипедия — ашық энциклопедиясынан алынған мәлімет
Мұнда ауысу: шарлау, іздеу

Әскери бөлім (Воинская часть) — әскери міндеттерді орындататын немесе бейбітшілік кезінде әскерлер құрамын үйретіп, дайындайтын, Қарулы Күштердің әрбір түрінде тактикалық жеке тапсырмаларды іске асыратын ұйымдаскан бөлім. Әскери бөлімнің аты, нөмірі, туы, әкімшілік, құрыныс, шаруашылық, басқарушы және жабдықтаушы мекемелері болады.[1] Әскери бөлім полктен, полктің құрамына кіретін батальондардан (дивизионнан), батальон — роталардан, ал рота — взводтардан, взвод — бөлімшелерден тұрады. Әскери бөлімге 1, 2, 3-рангілі кемелер де жатады. артиллериялық полк дивизиондардан, дивизион — батареялардан, батарея — есептоптардан құралады. авиациялық полк экскадрильяға, ал экскадрилья — звеноларға бөлінеді. Әскери бөлім әскери құраманың командиріне бағынады.[2]

Әскери бөлімнің жауынгерлік туы[өңдеу]

Әскери бөлімнің жауынгерлік туы — әскери белімнің жауынгерлік мұратының, тарихы мен сіңірген еңбегінің ерекшеліктерін айқындайтын, сондай-ақ оның ҚР Қарулы Күштеріне жататынын көрсететін айрықша құрметті белгі. Әскери бөлімнің Жауынгерлік туы жауынгерлік абырой, ерлік пен данқ нышаны болып табылады және әрбір әскери қызметшіге Отанымыздың ерлік дәстүрлері мен оны қорғау жөніндегі қасиетті борышын еске салу үшін қызмет етеді. Жауынгерлік туды әскери бөлімдерге олар құрылған кезде ҚР Президентінің атынан ҚР Қорғаныс министрлігінің өкілдері тапсырады. Жауынгерлік ту әскери бөлімнің атауы мен нөмірінің өзгеруіне қарамастан, әскери бөлімде біржола сақталады және жауынгерлік ту тапсырылған кезде берілетін ҚР Президентінің Грамотасына енгізіледі. Жауынгерлік ту әрдайым өз әскери бөлімімен бірге, ал майдан даласында бөлімнің соғыс қимылдары ауданында болады. Әскери бөлімнің күллі жеке құрамы соғыс кезінде Жауынгерлік туды жанқиярлықпен және ерлікпен қорғауға әрі оны дұшпандарының қолына түсірмеуге міндетті. Жауынгерлік ту жоғалған жағдайда, мұндай абыройсыздықка тікелей кінәлі әскери бөлімнің командирі мен әскери қызметшілер сотқа тартылуға, ал әскери бөлім таратылуға тиіс. Кемеде көтерілген ҚР Әскери-Теңіз туы кеменің Жауынгерлік туы болып табылады және оның мемлекеттік тиесілілігі мен оған кол сұғылмаушылықты бейнелейді.

Дереккөздер[өңдеу]

  1. Айбын. Энциклопедия. / Бас ред. Б.Ө.Жақып. - Алматы: «Қазақ энциклопедиясы», 2011. - 880 бет.ISBN 9965-893-73-Х
  2. Қазақ тілі терминдерінің салалық ғылыми түсіндірме сөздігі: Әскери іс. Алматы:"Мектеп" ААҚ , 2001