Қоғамның таза табысы

Қоғамның таза табысы – ұлттық табыстың бір бөлігін құрайтын қосымша өнім құны. Оның құрамына мемлекеттің орталықтандырылған таза табысы мен кәсіпорындардың (заңды тұлғалардың) таза табысы кіреді. Мемлекеттің таза табысын бөлу, қайта бөлу және пайдалану барысында таза табыс екі бөлікке: орталықтандырылған және орталықтандырылмаған таза табысқа бөлінеді. Мемлекеттің орталықтандырылған таза табысына салықтар кіреді. Ол жалпы мемлекеттік мұқтаждарға: экономиканы құрылымдық қайта құруға, кешенді нысаналы бағдарламаларды қаржыландыруға, әлеуметтік аяны қолдауға (денсаулық сақтау, білім беру), ғылыми-техикалық әлуетті еселей түсуге, елдің қорғаныс қуатын нығайтуға, аймақтық және ұлттық саясатты жүргізуге жұмсалады. Кәсіпорынның (заңды тұлғаның) таза табысы – өндіріспен байланысты іс жүзіндегі табыстар (жалданып жұмыс істеуден, кәсіпкерліктен, меншіктен алынған табыстар) мен ағымдағы трансферттер балансы қалдығының қосындысы. Кәсіпорынның (заңды тұлғаның) қарамағында қалған таза табыс күрделі жұмсалымды қаржыландыруға, айналым қаражатын толықтыруға, өндірісті техикалық жетілдіруге, т.б. пайдаланылады.