Ілияс Омаров атындағы Қостанай облыстық қазақ драма театры
| Ілияс Омаров атындағы Қостанай облыстық қазақ драма театры | |
|---|---|
| |
| Орналасуы |  ҚазақстанҚостанай |
| Негізделгені | 2000 |
| Директоры | Мырзахан Әлімхан |
| Көркемдік жетекшісі | Баатырбек Шамбетов |
| Бас режиссёрі | Құбаш Дос |
Ілияс Омаров атындағы Қостанай облыстық қазақ драма театры – мәдени-сахналық мекеме.
Тарихы
2000 жылы Қостанай қаласында «Мәдениетті қолдау жылының» аясында жергілікті биліктің бастамасымен ашылды. Ұжым негізін Алматыдағы өнер академиясының түлектері және Қазақстанның мәдениет қайраткері Қ. Есенқұлов, Қазақстанның еңбек сіңірген әртісі Ш. Есенқұлова (М.Щепкин театр училищесінің түлектері), актерлер О.Мұқашев, М.Жапаров, А.Қасымова, Л.Едіресова, Қ.Бекайдаров, З.Балтабаева, З.Әбдіхалықова, т.б. құрады.
Театр алғашқы сахна шымылдығын режиссер Жамбылбек Есенбековтің қоюы бойынша «Абылай хан» спектаклімен ашты. Сол кезде Нұрсұлтан Назарбаев театрға Қазақстан мәдениетіне елеулі үлес қосқан көрнекті тұлға Ілияс Омаровтың есімін беру жөнінде ұсыныс жасады. 2001 жылы театр репертуарына ҚР халық әртісі Тұңғышбай Жаманқұловтың қоюымен Назым Хикметтің «Шығыстың шерлі махабаты» және Лопе де Веганың «Батыстың махаббат машахаты» спектакльдері қосылды.[1]
2012 жылы 12 қаңтарда ТМД елдерінде теңдесі жоқ, шығармашылық ұжым үшін барлық жағдай жасалған жаңа театр ғимараты пайдалануға берілді. Осы жылы 1-5 қазан аралығында Ілияс Омаровтың 100 жылдығына орай театр фестивалі өтіп, оған республиканың 8 театры қатысты. Шығармашылық ұжымды талантты бас режиссер Жамбылбек Есенбеков басқарды.
Жетістіктері
Театр құрылғаннан бері әртістердің труппасы бірнеше рет республикалық және халықаралық деңгейдегі фестивальдерге қатысты:
- 2001 жыл – «Ең үздік ерлер рөлі үшін» номинациясының иегері Қонысбек Бегайдаров, Республикалық театр фестивалі (Петропавл қ.)
- 2003 жыл – «Ең үздік ерлер рөлі үшін» номинациясы бойынша актер Асылболат Исмағұлов, «Ең үздік әйел рөлі үшін» актриса Ақмарал Қасымова, Сәкен Жүнісовтің 70 жылдығына арналға фестивалі (Петропавл қ.)
- 2005 жыл – «Үздік әйел рөлі үшін» номинациясы бойынша актриса Замзагуль Балтабаева XIII Республикалық фестиваль (Қызылорда қ.)
- 2007 жыл – театр ұжымы Көкшетау қаласының Шаяхмет Құсайыновтың 100 жылдығына арналған фестивальда дипломмен марапатталды.
- 2008 жыл – Нұрмұхан Жантөриннің 80-жылдығына орай XVI Республикалық фестивальда театр ұжымына диплом және ақшалай сыйлық табыс етілді (Ақтау қ.)
- 2010 жыл – Әсел Шакіржанова Қостанай облысы "Қанатты әйел" қоғамдық тану әйелдер жетістіктері сыйлығына иеленді, Иса Байзақовтың 110 жылдық мерейтойына арналған республикалық әншілер байқауында Замзагуль Бегайдарова 2 орын алды (Павлодар қ.)
- 2012 жыл – «Екінші пландағы үздік ер рөлі үшін» номинациясы бойынша Олжас Бегайдаров, Әзірбайжан Мәмбетовтың 80 жылдығына арналған XII Республикалық театр фестивалі (Орал қ.)
- 2017 жыл – «Актерлық шеберлік» номинациясы бойынша Құбаш Мөлдір «Шабыт» ХХ Халықаралық жастар шығармашылық фестивалі (Нұр-Сұлтан қ.)
- 2018 жыл – «Ең үздік ер рөлі үшін» номинациясы бойынша Олжас Бегайдаров, Жанат Хаджиев атындағы халықаралық театр фестивалі (Жезқазған қ.)
Қостанай облысы Меценаттар Клубының «Қазына» және «Шабыт» сыйлығының иегерлері:
- «Қазына» – Шахарбанум Есенғұлов, Қонысбек Бегайдаров, Қабдул-Мәжіт Иманов, суретшілер Маралбек Нұрмаханов пен Әнуар Сәпиев.
- «Шабыт» – Ақмарал Қасымова, Замзагуль Бегайдарова, Әлімхан Мырзахан, Олжас Бегайдаров, Нұрлан Байшин, Мөлдір Құбаш.
Бүгінгі күнде театр репертуарында 30-дан астам ұлттық, шетелдік классика мен заманауи драматургия қойылымдары бар. Сонымен қатар Қостанай өлкесінің танымал тұлғалары Ыбырай Алтынсарин «Дала шамшырағы», Сұлтан Баймагамбетов - "Ер Сұлтан", Шоқан Уәлиханов – «Шоқанның шері", Мыржақып Дулатов "Мыржақып", Мариям Хәкімжанова және Ильяс Омаровтың өмірі туралы "Мариям, Илияс" спектакльдері қойылды.
Театр сайты
Дереккөздер
- ↑ Қазақстанның мәдени ошақтары. Культурные центры Казахстана: Фотоальбом. – Алматы:«АСА» Баспа үйі» ЖШС, 2012. – 288 б. (қазақ, орыс, тілдерінде) ISBN 978-601-80325-0-9