Валюталық құндылықтар

Валюталық құндылықтар — арнаулы заңдармен ел территориясынан алып кетуге және алып келуге айрықша шектеу тәртібі белгіленген материалдық құндылықтар. ҚР-ның заңдарына сәйкес шетелдік валюта немесе номиналы шетелдік валютамен есептелетін құнды қағаздар мен төлем құралдары және құйма түріндегі қоспасыз саф алтын валюталық құндылықтар болып саналады. Шетелдік валюта дегеніміз — айналымда жүрген, тиісті шет мемлекетте не шетелдік мемлекеттер тобында заңды төлем қаражаты болып табылатын, сондай-ақ айналымнан шығарылған, алайда ақша айырбасына жарай беретін банкнот, қазына билеттері, монета түріндегі ақшалар. Ал құнды қағаздар мен құны немесе номиналы шет ел валютасымен белгіленетін төлем құралдарына чектер, вексельдер, аккредитивтер, қор құндылықтары (акциялар, облигациялар, т.б.); шет ел валютасымен есептелген басқа да борыштық міндеттемелер жатады. Валюталық құндылықтар болып саналмайтын қымбат бағалы металдар мен табиғи асыл тастарды, олардың сынықтарын зергерлік және т.б. тұрмыстық бұйымдар санатына жатқызудың тәртібі мен шарттарын үкімет белгілейді. ҚР-ның 1996 ж. 24 желтоқсандағы “Валюталық реттеу туралы” заңының 13-бабында В. қ-ды ішке алып келу және сыртқа шығару тәртібі қарастырылған.