Еңбекте шыңдал (мақала)

Еңбекте шындал – Қаныш Сәтбаевтың мақаласы. 1989 жылы «Ғылым» баспасынан шыққан «Ғылым мен мәдениет туралы таңдамалы мақалалары» жинағына, 2007 жылы «Оңтүстік полиграфия» баспа үйінен шыққан шығармалар жинағының 1-томына енген. Бұл мақаласында ғалым еліміздің жігерлі де еңбекшіл жастарын Қазақстанның қыруар қазынасын қол салып қопарып, ел игілігіне жұмсауға шақырады.

Сондай-ақ республикамыздың геологиялық картасынан Менделеев кестесіндегі барлық элементтерді кездестіруге болатыны, бір ғана Жезқазғанның мыс кеніне дүние жүзінде сапа жағынан да, қор жағынан да тең келетін кен орны жоқ екені, сондықтан бүгінгі ұрпақ үшін зауыт цехындағы, шахта лавасындағы, құрылыс алаңындағы еңбек шынайы шынықтыратын мектеп болатыны жөнінде айтқан.

Еңбек етпесең, жиған білімің - кәдеге жарамай жатқан минерал секілді, оның ішін ашып, асыл кенін жарқырату үшін еңбек керек, қол мен ой қимылы қажет деген ойларын ортаға салады. Жастарға біліміңді еңбек пен өмірдің өзінде шыңдап отыр, сонда ғана білім деп аталатын асыл тас ешқашан тот баспастан жалтырай да жарқырай береді деген тілек айтады.