Жасыл дақылдар

Жасыл дақылдар — жапырағы, жапырақ сағағы және сабақтары тағамға пайдаланылатын өсімдіктер. Жасыл дақылдарға пияз (жасыл сабағы), салат, саумалдық, аскөк, рауғаш, қымыздық, ақжелкек, балдыркөк, хош иісті насыбайгүл, т.б. жатады. Олардың құрамында көп мөлшерде дәрумендер мен құнды қоректік заттар болады. Жасыл дақылдардың тез өсіп-жетілетіндігі (жапырақты салат 30 — 45, қауданды салат 45 — 60, саумалдық 30 — 40, аскөк 40, пияздың жасыл сабағы 20 — 35 тәуліктен кейін өсіп-жетіледі) оларды бірнеше рет егіп, жыл бойы пайдалануға мүмкіндік береді. Жасыл дақылдар құнарлы, ылғал топырақта жақсы өседі. Ашық жерде Жасыл дақылдарды тығыз (қызанақ, қырыққабат, т.б. қатар аралығына егеді) және аралық (кеш пісетін дақылдардың алдында ерте көктемде егеді) егісте өсіреді. Жасыл дақылдар суыққа төзімді келеді, 12 — 15°С температурада жақсы өседі, –3 — 5°С температурада үсімейді. Тез бүлінетін болғандықтан Жасыл дақылдарды дер кезінде пайдалану керек.