Карлос Тевес

Уикипедия — ашық энциклопедиясынан алынған мәлімет
Мұнда ауысу: шарлау, іздеу
Карлос Тевес

Карлос Альберто Тевес (шынайы тегі Мартинес) - аргентиналық футболшы. 1984 жылы Аргентина астанасы Буэнос-Айрес қаласында туған.

Балалық шағы[өңдеу]

Карлос Тевес орташа табысты бес балалы отбасында дүниеге келіп, балалық шағы Буэнос-Айрес маңында орналасқан ең бұзақы «Фуэрте-Апаче» деген ауданыда өтті. Тевес бала кезінде үй бөлмелерін аралап жүріп, ас үйінде қайнап тұрған шәйнекті өзінің денесіне төңкеріп алады. Қайнап тұрған судың төгілуінен болған әсерден оның мойны мен кеудесі күйеді. Бірақ, бүгінде бұл белгілерді кетіруден бас тартқан Мартинес-Тевес мұндай қылығын өткен шақпен қоштасқысы келмейтіндігімен түсіндіреді. Карлостың тұңғыш жастар клубы «Олд Бойз» болған еді. Оның сол кездегі тегі Мартинес болған еді. Осындан кейін «Олд Бойз» бен «Бока Хуниорс» арасындағы кикілжіңдері нәтижесінде ол анасының тегін алуға мәжбүр болады.

Кәсіби мансабы[өңдеу]

«Бока Хуниорс»[өңдеу]

Тевес өзінің кәсіби мансабын он алты жасында «Бока Хуниорста» бастаған еді. Алғаш рет алаңға ол 2001 жылы 21 қазанда «Тальереске» қарсы кездесуде шықты. Ол «Бокамен» Аргентина Примерасын (2003), Либертадорес Кубогын (2003), Оңтүстік Америка Кубогын (2004) пен Құрлық аралық кубоктарда жеңіске жетеді. 2003 пен 2004 жылдарда Тевес Оңтүстік Америка мен Аргентинадағы үздік ойыншы болып танылады.

«Коринтианс»[өңдеу]

Тевес Бразилия президенті Lula-мен бірге.

2004 жылдың желтоқсанында Тевес бразилиялық «Коринтианс» клубына 20 млн. АҚШ долларға ауысады. Бұл Оңтүстік Америка тарихында ең қымбат трансфер болды. Ел президенті Лулу да Силва бастаған бразилиялықтар бастапқыда аргентиналықты жатсынып, салқын қабылдаған еді. Алайда, сәлден соң Карлос өз шеберлігін көрсете біліп, команданың капитаны әрі жетекші ойыншысына айналды. 2005 жылы ол Бразилия чемпионатының алтын медальдарын жеңіп, турнир қорытындылары бойынша үздік ойыншы болып танылады. Тевес чилилік Элиас Фигероадан кейінгі осы атаққа қол жеткізген екінші бразилиялық емес футболшы атанды. «Коринтианстағы» шағында жоғары нәтижелілігімен көрінген «Карлитос» 75 ойында 46 доп соға білді.

«Вест Хэм»[өңдеу]

Еуропалық трансферлік кезеңінің соңғы күні, 2006 жылы 31 тамызда Тевес өзінің отандасы Хавьер Маскераномен бірге 12 млн. фунт стерлингке «Вест Хэм Юнайтедке» ауысатыны мәлім болды. Бұл мәміле баспасөз беттерінде келісім-шарттың шынайы ережелері жөнінде көптеген өсек-аяндардың пайда болуына себеп болды. Аталған екі футболшылардың келуінен кейін «Вест Хэм» көп уақытқа дейін ұтылыстардан көз ашпады. Бірақ, 2006/07 маусымының аяқталар шағы жақындай келе Тевес өз бабына ене бастады. Оның көмегімен «Вест Хэм» Премьер-лигадағы өз орнын сақтап қала алды.

«Манчестер Юнайтед»[өңдеу]

2007 жылдың жазында Тевестің «Манчестер Юнайтедке» ауысуға ынталы екендігі белгілі болды. Біраздан соң, заңгерлік және қаржылық мән-жайлар әйтеуір қалпына келген соң, футболшы өз дегеніне жетті. 2007 жылы 15 тамызда аргентиналық «МЮ» сапында алғашқы кездесуін өткізіп үлгерді. Оның Чемпиондар Лигасына алғаш қатысуы «Манчестердің» киевтік «Динамомен» кездесуіне дәл келді. Осы турнирде ол өз командасы үшін аса қажетті бірнеше голдарымен танылып, «Қызыл сойқандардың» финалға шығуына көмектеседі. Англия чемпионы мәртебесін иеленген «Манчестер Юнайтед» Чемпиондар Лигасының финалында Премьер-лигадағы қарсыласы «Челсимен» кездеседі. «МЮ» пенальти сериясында лондондықтарды тізе бүктіреді. Осылайша, Тевес клубтағы тұңғыш маусымында ең маңызды еурокубок жеңімпазы болады.

«Манчестер Сити»[өңдеу]

2009 жылдың 30 шілдесінде Тевестің «Манчестер Юнайтедпен» келісім-шарты аяқталып, аргентиналық көршілес «Манчестер Ситиге» көшеді. Бас бапкер Марк Хьюз Карлостың клубтың алға жылжуына бірден-бір әсері болатынына сенім білдірді.

Сілтемелер[өңдеу]