Радиолокациялық қамтамасыз ету

Радиолокациялық қамтамасыз ету — зениттік ракеталық әскерлердің (ЗРӘ) және әуе шабуылына қарсы қорғаныс (ӘШҚҚ) авиациясының ұрыстық қимылдарын табысты жүргізуіне жағдайлар жасау мақсатында радиотехникалық әскерлер жүргізетін шаралар жүйесі. Оның құрамына: радиолокациялық барлау, әскерлерді басқаруды радиолокациялық қамтамасыз ету зениттік ракеталық әскерлердің және әуе шабуылына қарсы қорғаныс авиациясының ұрыстық кимылдарын радиолокациялық қамтамасыз ету кіреді.

Радиолокациялық барлау алыс қашықтықтарда қарсыластың әуеден шабуылдау құралдарын уақытылы табу, олардың координаттары, құрамы және ұрыстық реттерін анықтау мен үздіксіз бақылау мақсатында әуе кеңістігін үздіксіз радиолокациялық шолу түрінде жүргізіледі. Әскерлерді басқаруды радиолокациялық қамтамасыз ету әуедегі жағдай туралы мәліметтерді әуе шабуылына қарсы қорғаныстың басқару пункттеріне үздіксіз беруден тұрады.

Зениттік ракеталық әскерлер мен әуе шабуылына қарсы қорғаныс авиациясының ұрыстық қимылдарын радиолокациялық қамтамасыз ету шептерді анықтау және зенитті ракеталық бөлімшелерге нысана көрсету мен тосып алушы жойғыштарды бағыттау үшін қажет дәлдікпен әуедегі қарсылас туралы уақтылы мәліметтер беруден тұрады. Радиолокациялық қамтамасыз етуге қойылатын негізгі талаптар тиімділік және сенімділік. Тиімділікке радиотехникалық бөлімдерді мақсатқа сай орналастыру және қажет параметрлі радиолокациялық алаң құрумен, сонымен қатар тұрақты жауынгерлік кезекшілік жүргізумен қол жеткізіледі.

Сенімділікке басқару мен байланыс жүйелерінін жұмыстарын ұқыпты ұйымдастыру, радиотехникалық әскерлер, зениттік ракеталық әскерлер мен әуе шабуылына қарсы қорғаныс авиациясы жауынгерлік есептерінің келісімді қимылдарымен, радиотехникалық әскерлердің бөлімшелері мен бөлімдерінің жоғары төзімділігі және радиоэлектрлік құралдардың кедергіге беріктігімен қол жеткізіледі.