Севан-Доржы

Севан-Доржы, Цеван Дорджи, Яджа - Намжил (1733-1750) - жоңғар ханы (1746-50). Қалдан Сереннің ортаншы ұлы. Әкесі өлгеннен кейін 13 жасында хан тағына отырды. Бірақ билікті апасы жүргізді. Көп ұзамай Севан-Доржы оны дарға астырып, билікті өз қолына алды. Оның билігі тұсында хандық биліктің беделі төмендеді, хан тағына үміткерлердің арасында талас күшейді. Севан-Доржының беделді зайсан Олдызды тұтқындауға әмір беруі өзара қырқысты өршіте түсті. Олдыздың жақтастары хандық билікті мойындаудан бас тартып, Ресей мен Орта жүз ханы Абылай иеліктеріне барып бас сауғалауға тырысты. 1748 жылы Қытай императоры Цянь Лун қытай-жоңғар сауда қатынастарын шектеді. Бұл хандықтың экономикалық жағдайын қиындата түсті. Осындай қиын ахуалдан шығу үшін Севан-Доржыны тақтан тайдыруға ұмтылғандардың бірі Лама-Доржы болды. Оның ұйымдастыруымен Севан-Доржы қастандықпен өлтірілді.