Стивен Джеррард
Стивен Джордж Джеррард - Ағылшын футболшысы. 1980 жылы 30 мамырда Мерсисайд графтығының Уистон қалашығында өмірге келді. "Ливерпуль" ойыншысы.
Мазмұны |
[өңдеу] Футболдағы алғашқы қадамдары
Джеррард футбол ойнауды туған қаласының «Уистон Джуниорс» командасының құрамында бастаған. 9 жасында оны «Ливерпуль» скауттары байқап, 1989 жылы ол «Қызылдардың» жас жеткіншектер командасына қосылады. Балалық шағында Стивен керемет өнерімен көрінбей, командасының негізгі құрамында сирек енетін.
[өңдеу] «Ливерпульдің» негізгі құрамында
Негізгі құрамда 1998 жылдың 29 қарашасында «Блэкберн Роверзке» қарсы ойында екінші таймда Веггард Хеггемді алмастыру арқылы алаңға шығады. Алғашқы маусымында Джеррард УЕФА Кубогында «Сельтамен» болған ойында жақсы жағынан көрсетіп, сол маусымда Джейми Реднаппты алмастырып, 13 ойын өткізіп үлгереді.
[өңдеу] УЕФА Чемпиондар Лигасы
2004/05 УЕФА Чемпиондар Лигасының топтық турниріндегі соңғы матчта «Олимпиакоспен» өткен ойында мерсисайдтықтарға келесі айналымға шығу үшін 2:0 есебімен жеңіске жету керек еді. «Ливерпуль» мұратына жетіп, шешуші 22 метр қашықтықтан соғылған голдың авторы дәл сол Стивен Джеррард болды. Сол маусымда «Қызылдар» ақтық кездесуге дейін жетіп, баршаның есінде қалған триллердің авторы атанды. Истанбулдың «Ататүрк» стадионында «Милан» алғашқы 45-минутта еш мүмкіндік берместен, ағылшындар қорғанысының тоз-тозын шығарып жатты: 3:0. Екінші тайм сценариі керісінше өрбіді. Командасын алға сүйреген Джеррард бұл ойында өзін нағыз көсем ретінде танытып, «Ливерпульге» жан бітірген алғашқы қарымта добын соқты. Бұдан кейінгі оқиғалар тарихқа мәлім. Нәтижесінде жеңіске жеткен «Ливерпуль» Еуропаның клубтық чемпионы атанды. Ал, күміс Кубокты көтерген Стивен Джеррард жеңіске жеткен екінші ең жас капитан атанды (ең жас капитан 1991 жылы Дидье Дешам болды).
[өңдеу] Барлық финалдарда доп соққан сұрмерген
Келесі жылы Англия Кубогының финалында мергендігімен көрінген Джеррард ағылшын командалары қатыса алатын барлық турнирлердің финалдарында доп соға білген жалғыз футболшы болды. Стивен Англия Кубогы (2006 жылы «Вест Хэм»), Лига Кубогы (2003 жылы «Манчестер Юнайтед»), УЕФА Кубогы (2001 жылы «Алавес»), Чемпиондар Лигасының (2005 жылы «Миланға») қарсы финалдарының бәрінде голдарымен танылды.
[өңдеу] Англия құрамасы
Жартылай қорғаушы Стивен Джеррард Англия құрама командасы сапында алғашқы ойнын 2000 жылы 31 мамырда Украинаға қарсы өткізді. Джеррард екі жылдан соң Алмания құрамасымен болған әйгілі 2002 жылғы Әлем чемпионатына іріктеу матчында «бундесманншафт» қақпасына голдарды топырлатқан футболшылардың бірі атанды. Ағылшындар сырт алаңда 5:1 есебімен жеңіске жетіп, Джеррард құрама ойындарындағы алғашқы добын соқты. Англияның 2006 жылғы Әлем чемпионатындағы ширек финалда Португалиямен өткен ойнындағы ағылшындар үшін қашанда қайғы-қасіретке толы пенальтилер сериясында Джеррардтың басқа үш командаласының сияқты соққыларын португалдықтардың қақпашысы Рикарду қағып жіберді. 2010 жылғы әлем чемпионатында да ағылшындардың жолы болмай, Англия 1/8 финалда 1:4 есебімен немістерге жол береді.
 |
Бұл мақаланы Уикипедия сапа талаптарына лайықты болуы үшін уикилендіру қажет. |
