Сыдықбеков Түгелбай

Сыдықбеков Түгелбай (14.5.1912, Қырғызстан, Ыстықкөл облысы Түп ауданы – 19.7. 1997, сонда) – қырғыз жазушысы. Қырғызстан Ғылым Академиясының академигі (1954). Алғашқы өлеңдер жинағы “Күрес” 1933 жылы жарық көрді. “Батырлар” (1936), “Ақын – бұлбұл” (1938) атты жыр жинақтарын, қырғыз әдебиетіндегі тұңғыш “Кеңсу” (1, 2-кітабы 1937 – 1938) романын жазды. “Темір” (1939 – 1940), “Біздің заманның адамдары” (1948, Кеңестік Социалистік Республикалар Одағының Мемлемлекеттік сыйлығы 1949; қазақ тілінде 1950) романдары басылған. Сыдықбеков шығармаларында ерекше бағаланатын “Тау ішінде” романының 1-кітабы 1955 жылы (қазақ тілінде 1961), 2-кітабы 1958 жылы (қазақ тілінде 1961) жарияланды, бұл – “Кеңсу” романының қайта өңделген нұсқасы еді. Ол 1955 жылы “Зайыптар” трилогиясының алғашқы екі кітабын оқырманға ұсынды. Жазушы “Тау балалары” (1952, қазақ тілінде 1956) романы арқылы қырғыз балалар әдебиетін дамытуға мол үлес қосты. Көптеген қазақ жазушыларымен тығыз қарым-қатынаста болып, қырғыз арасында қазақ әдебиеті үлгілерінің кеңінен таралу ісінде үлкен рөл атқарды. Сыдықбеков 4-сайланған Кеңестік Социалистік Республикалар Одағының Жоғарғы Кеңесінің депутаты болды. Еңбек Қызыл Ту орденімен, бірнеше медальдармен марапатталған.

Дереккөздер

«Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, VIII том