Тасболат мұнай-газ конденсат кен орны

Тасболат мұнай-газ конденсат кен орны — Оңтүстік Маңғыстау ойысы, Өзен-Жетібай антиклиналдық белдемінде, Ақтау қаласынан оңтүстік-шығысқа қарай 90 км жерде Қарақия ауданында орналасқан. 1965 жылы шағылған толқындар әдісімен сейсмобарлау кезінде ашылған. 1982 жылдан игеріліп келеді.

Геологиялық құрылымы

Құрылымы бойынша брахиантиклинальдық қатпарда жатыр. Триастың шөгінді карбонатты-терригендік тау жыныстарынан құралған (әктастар, доломиттер, құмтастар, аргиллиттер) қат-қабатта үш кен шоғыры анықталған. Мұнай мен газ юра кезеңінің құм-алевролит және саз-аргиллит тау жыныстарынан құралған қатқабатында орналасқан. Осы қатқабаттың 9 горизонтында 14 кен шоғыры анықталған. Олардың көпшілігі газды, екеуі мұнай, екеуі газ-мұнай конденсатты, біреуі газ конденсатты кен орындары.

Жатыс сипаты

Тұтқышының сипаты жағынан шоғырлардың көпшілігі қойнауқаттық, күмбездік. Газды бөлігінің биіктігі 207 м, мұнайлы бөлігінде 47 м. Бір-бірінен қалыңдығы 3 – 30 м-дей сазды қабаттармен бөлінген жеке горизонттардың қалыңдығы 6 – 17 м-ден 51 – 66 м-ге дейін жетеді. Құнарлы горизонттардағы тау жыныстарының кеуектілігі 14 – 20,2%, газ бен мұнайға қаныққандығы 54 – 68%, өткізгіштігі 18,3 – 95,2 миллидарси.

Құрамы

Мұнайының тығыздығы 835 – 851 кг/м³, күкірті 0,10 – 0,14%, парафині 12,7 – 36,7%, шайыры 1,83 – 11,8%, қату t 21 – 36°С, 300°С-та бөлінетін мөлдір фракциялардың мөлшері 17 – 63%. Газының тығыздығы 593 – 709 кг/м³, құрамы (%-бен): метан 75,2 – 93,4, этан 3,7 – 12,5, пропан 0,26 – 5,2, ауыр көмірсутектер 0,5 – 2,5, азот 0,04 – 11,3. Конденсатының тығыздығы 734 – 780 кг/м³, қаныққан көмірсутектер мөлшері 69,4 – 77,2%. Қоры жөнінен орташа кен орнына жатады.