Сеңгір таулары

Уикипедия — ашық энциклопедиясынан алынған мәлімет
Мұнда ауысу: шарлау, іздеу
Сеңгір таулар

Сеңгір таулар (ағылш. Rocky Mountaіns) — Солтүстік Американың батысындағы (Канада және АҚШ жерінде) тау жүйесі. Солтүстік-батыстан оңтүстік-шығысқа қарай 3200 км-ге созылған, ені 700 км-дей. Солтүстік Америкадағы Кордильераның шығыс бөлігін құрайды. Көптеген шыңдарының биіктігі 3500 м-ден (Колумбия тауы, 3747 м; Робсон, 3954 м) асады. Ең биік жері — Элберт тауы (4399 м). Тынық және Атлант мұхиттары алабының суайырығын құрайды. Сеңгір таулардан Миссури, Колорадо, Рио-Гранде, Снейк, Арканзас, т.б. өзендері басталады.

Сеңгір таулар Ларамий қатпарлығы кезеңінде (бордың аяғы — палеоген) қалыптасып, кейіннен жаңа көтерілімге ұшыраған. Молибден, мыс, алтын, күміс, полиметалл, мұнай, тас көмір кендері шоғырланған. Гейзерлер мен термалды бұлақтар бар. Солтүстік беткейлерінде тайгалық орман, оңтүстігінде қарағайлы орман басым. Ормандардың жоғ. шекарасының биіктігі 1500 м-ден (солтүстік) 3600 м-ге (оңтүстік) дейін, одан жоғары — альпі шалғыны мен мәңгі қар, мұз тараған. Аңғарлары — дала мен шөлейт. Ірі ұлттық саябақтары: Джаспер, Банф, Йохо (Канадада), Йеллоустон, Роки-Маунтин (АҚШ-та).