Шығыс Оңғар мұнай кен орны

Шығыс Оңғар мұнай кен орны — Каспий маңы ойысының оңтүстік шығыс бөлігіндегі мұнай кен орны. Атырау облысында, Доссордың солтүстігінде 60 км жерде орналасқан. 1989 жылы ашылған.

Геологиялық құрылымы

Кен орнының қимасы юра мен бордың терригендік қатқабатынан құралған. Құрылымдық орны жөнінен батыс жағынан тектоникалық бұзылысқа түйісетін жартылай күмбез. Бойлыққа жуық бағытта созылған лықсыма арқылы жартылай күмбез алаңша, Оңтүстік Шығыс және Солтүстік Батыс алаңшаларға дараланған, Солтүстік Батыс алаңша өз кезегінде, ендікке жуық бұзылыспен күрделіленіп, екі блокқа бөлінген. -950-лік изогипса бойынша көтерілімнің өлшемдері 2,5x7 км, биіктігі 350 м. Ортаңғы юра шөгінділерінде 522 және 601 м-лік тереңдіктерде жатқан екі горизонттың өнімділігі анықталды. Құмтастардан құралған жинауыштарының ашық кеуектілігі 33%, өтімділігі 0,63 мкм², тиімді қалыңцығы 7,5 және 4,2 м, мұнайға қаныққан қалыңдығы, тиісінше, 6,2 және 4,6 м, қанығу коэффициенті 0,55.

Жатыс сипаты

Мұнайлы жатындар қойнауқаттық, тектоникалық тұрғыдан қалқаланған, жапқышы қалыңдығы 6 м-ге дейін жететін саздан тұрады. Мұнайлы бөлігінің биіктігі 8,6-4,6 м. Су-мұнай жапсарлары -563,5 және -626,9 м-лік белгілерде. Бастапқы қойнауқаттық қысым мен температура 5,58 Мпа және 27°С болды. 517 м-лік динамикалық деңгейдегі мұнай шығымы 4,2 м³/тәу-ке жетті. Екінші горизонттың мұнай шығымы 465 м-лік динамикалық деңгейде 13,2 м³/тәу шамасын құрады.

Құрамы

Кенорынның мұнайы ауыр, тығыздығы 899,8-923 кг/м³, күкірттілігі аз (0,3-0,4%), парафинділігі төмен (2,0-2,23%), асфальтендер мөлшері болмашы, силикагельдік шайырлардың жоғарғы мөлшерімен ерекшеленеді. Қойнауқаттық сулары хлоркальцийлі типті әлсіз тқздық түрінде кезедеседі, тығыздығы 1113 кг/м³, минералдылығы 175 г/л. Суларда йод (8,62 мг/л) және бром (167 мг/л) бар. Жатындардың режимі суарынды. Кен орнында жұмыс 1992 жылдан бері тоқтатылған.