Борис Владимирович Анненков

Анненков Борис Владимирович (1889, Киев губ. — 25.8.1927, Семей) — Сібір казак әскерінің атаманы. Шыққан тегі — дворян. Бірінші дүниежүзілік соғысқа қатысқан. 1918 — 20 ж. Кеңес өкіметіне қарсы ақ казактарды бастап соғыс жүргізді. 1918 ж. Анненков тың құрама дивизиясы (10 мыңға жуық адам) Қазақстанның солт., орталық аудандары мен Ертіс бойында, ал 1919 жылдың қаңтарынан Жетісуда әскери-соғыс диктатурасын орнатты. Жүріп өткен жерлерін қанға бояды. Қазақ ауылдарын, орыс селоларын қырғынға ұшыратты. Бесіктегі нәрестелерді найзаға ілді. Қарсыластарын атып-шауып, “Азап вагондарында” қинап, пароход пешіне жақты (өскемендік Я.Ушанов т.б.). Анненковшылдар Омбы мұражайынан тонап алған қанішер казак атаманы Ермак туының астында соғысты. 1919 жылдың соңында Колчак Анненков ты Жетісудағы ақтар армиясының қолбасшысы етіп тағайындады. 1920 жылғы сәуірде Қытайға өтті. 1926 ж. ұсталып, әскери трибуналдың үкімімен азамат соғысы жылдарындағы бейбіт халыққа жасаған қиянаты үшін атылды.