Қуық

ҚУЫҚ (vesіca urіnarіna) – кейбір омыртқасыздарда, омыртқалы жануарлар және адамда несеп жиналатын орган. Ол үстіңгі (алдыңғы жағына қарай бағытталған), орталық бөлігі (денесі) және түбі деп аталатын 3 бөліктен тұрады. Қуықтың қабырғасы негізінен бұлшық ет қабатынан құралған, сондай-ақ, шырышты, дәнекер қабықтары, сыртында сірі қабығы болады. Бұлшық ет жиырылғанда Қуықтағы зәр несеп шығару өзегіне өтіп, Қуық зәрден босайды. Адам Қуығына 400 мл-дей несеп сыяды. Омыртқасыздарда Қуық дара, жұп не бірнешеу болады. Мысалы, коловраткалдардағы дара Қуық клоака (ас қорыту, зәр шығару және жыныс жүйесі тоғысатын тік ішектің кеңейген бөлігі) ішіне ашылса, сүліктің Қуықтары сыртқа ашылады. Ал қосмекенділер мен бауырымен жорғалаушыларда, кейбір бір тесікті сүтқоректілерде Қуық клоакаға ашылса, қалталыларда және ұрықжолдасты сүтқоректілерде несеп шығару өзегіне ашылады. Құстарда (түйеқұстан өзге) Қуық болмайды. Қуықтың шырышты қабығының клеткасы натрий тұзын сіңіріп, Н+ ионын шығарады (секреттейді). Жиі кездесетін қуық аурулары: цистит, Қуық сыртының қабынуы (парацистит), Қуық қабынуынсыз зәр жүруінің бұзылуы (цисталгия), шыжың, Қуықтың қатерсіз және қатерлі ісіктері.