Семей мемлекеттік университеті

Семей Мемлекеттік Университеті - Шәкерім атындағы жоғары оқу орны. 1996 ж. Семейдің педагогикалық, зооветеринарлық, технологиялық институттарын біріктіру негізінде құрылған. 1999 ж. Шәкерім аты берілді. Университет құрамында агроэкологиялық, ақпараттық-коммуникациялық технология, әлеуметтік-гуманитар ғылымдар және құқық, қаржы-экономика, технология, үздіксіз білім беру ин-ттары, агротех. колледж, химия және экол. мәселелердің, мал шаруашылық, экология, экономика, ет және сүт өнімдерінің өнеркәсіптік ғылыми-зерттеу орталықтары, сондай-ақ “ХХІ ғасыр және Шәкерім әлемі” ғыл. мәдени зерттеу, ветеринарлық және селекц. қызмет көрсету, әлеуметтік мониторинг және жоспарлау, ақпараттық технологиялар, білім беру сапасын басқару, ақпараттық талдау орталықтары, оқу-өндірістік ғылыми кешені бар. 2004 ж. университеттен Семей мемлекеттік педагогикалық институты қайтадан бөлініп шықты. Семей Мемлекеттік Университетінде 5500-ден астам студент 78 мамандық бойынша білім алады. Оларға 16 ғылым докторы мен 140 ғылым кандидаты дәріс оқиды. Білім беру бағдарламасы дәстүрлі және кредиттік технология бойынша бакалавриат, магистратура, аспирантура және докторантурада іске асырылады. 2 диссертацациялық кеңес жұмыс істейді. Білім беру барысында жаңа заманға сай (компьютерлер, интернет, лингафондық бөлме) ақпараттық технология құралдары пайдаланылады. Спорт кешені, асханасы және жатақханасы бар.