II Кир

Кир ІІ, Ұлы Кир (туған жылы белгісіз – б.з.б. 530) – ежелгі парсы патшасы (б.з.б. 558 – 530). Ахемен әулетінен шыққан. Б.з.б. 558 жылы парсы тайпалары одағын басқарды. Б.з.б. 550 – 549 жылдарыМидия патшалығын тізе бүктіріп, осы ел билеушілерінің лауазымын қабылдады. Б.з.б. 546 жылы Лидия мен Кіші Азиядағы грек қалаларын, 545 – 539 жылдары Орта Азияның едәуір бөлігін, 539 жылы Месопотамия мен Вавилонды (Бабыл) жаулап алды. Б.з.б. 530 жылы Сырдария өзені бойын мекендеген сақ (массагет) тайпаларымен кезекті шайқас барысында қаза тапты. Грек жылнамаларында жазылып қалған аңыз бойынша, массагеттердің әйел патшасы Томирис (Тұмар ханым) Кир ІІ-нің басын кесіп алып, қан толтырылған торсыққа салып қойған.