Геодинамика

Геодинамика(грек. ge — Жер және dynamіs — күш) — Жер планетасы эволюциясының нәтижесінде пайда болатын, Жердің ішкі және сыртқы қатты қабаттарындағы зат массаларының қозғалысы мен энергиясын анықтайтын күштер мен процестер туралы ғылым. Г. Жер туралы басқа ғылымдармен, әсіресе геофизика, геохимия, петрология, тектоникамен тығыз байланысты. Г. жеке ғылым болып 1950 жылдары қалыптаса бастады. Оның бастауында неміс ғалымы А. Вегенер, Америка ғалымдары А. Холмс пен Х. Хесс тұрды. Зерттеу объектілеріне қарай Г. бірнеше бағытқа жіктеледі. Жалпы Г. немесе ішкі қабықтар Г-сы тереңдегі процестерді зерттейді. Дербес Г. сыртқы қабықтардағы процестерді, яғни литосфералық плиталардың қозғалысын, олардың Г-лық жағдайларын т.б. анықтайды. Аймақтық Г. литосфералық плиталардың өзара әсерлесуін және жер бетінің нақтылы бір аймақтарындағы әсерлесу нәтижелерін зерттейді. Тарихи Г. немесе палеогеодинамика өткен геол. мерзімдердегі Г-лық жағдайларды қарастырады.

Пайдаланылған әдебиет

“Қазақ Энциклопедиясы”, 2-том