Шимпанзе

Шимпанзе – адам тәрізді маймылдардың понгидтер тұқымдасына жататын маймыл. «Кәдімгі» және «ергежейлі шимпанзе» деген екі түрі бар.

Шимпанзе ДНК-сының 98,4%-ы адамдікіне ұқсас. Шимпанзе адамға горилладан да жақын. Басындағы миының көлемі адам миының жартысындай болады.

Шимпанзе Батыс және Орталық Африканы мекендейді.

Ересек аталық шимпанзенің салмағы – 35 – 70 келі, бойы 0,9 – 1,2 метр болады, аналық шимпанзенің салмағы – 26 – 50 келі, бойы 0,66 – 1 метр болады.

Өз бетімен тіршілік етіп жүрген шимпанзе 40 жылдан артық өмір сүрмейді, ал адам қолына үйретілген бір шимпанзенің 60 жыл өмір сүргені туралы дерек бар.

Шимпанзенің дене тұрқы – тапалтақ, қолдары ұзын, аяқтары қысқа болады. Денесінің басым бөлігін ұзын, қара жүн жапқан. Бірақ беті, құлағы, алақандары жүнсіз болады.

Қолдары зат ұстауға епті келеді. Шимпанзенің кей жағдайда құрал-сайман қолдануы адамдары қатты таңғалдырады.

Шимпанзелер бір-бірімен ымдасып «сөйлеседі».

Шимпанзе, негізінен, тропиктік ормандар мен ылғалды саванналарда тіршілік етеді. Жерде де, ағаш басында да жүргенімен, қоректенуі мен ұйықтайтын уақыттың басым бөлігі ағаш үстінде өтеді.

Жалпы алғанда, шимпанзелер жеміс және өсімдіктермен қоректенеді. Сондай-ақ түрлі жәндіктерді, жұмыртқа, ет, өлекселерді де жей береді. Тамақ талмағай, азық атаулының жүздеген түрін жейді.

Шимпанзе түсте ағаш басына өрмелеп шығып демалады, түнде де сонда түнеп шығады. Жапырақ пен бұтақтан «төсек құрастырып», лезде өзіне ұя жасап алады.