Инвестициялық саясат

Инвестициялық саясат – инвестициялардың неғұрлым басым бағыттарын айқындайтын шаралар жүйесі; өндірісті, кәсіпкерлікті дамыту, пайда немесе басқа да түбегейлі нәтиже алу мақсатында шаруашылық жүргізуші субъектінің (кәсіпорынның, фирманың, компанияның, т.б.), аймақтың, елдің ішінде де, сондай-ақ одан тысқары жерлерде де қаражат (инвестиция) салудың көлемін, құрылымы мен бағытын белгілейтін шаруашылық шешімдерінің жүйесі.

Инвестициялық бағдарламаларға сәйкес инвестициялық саясат мынадай жолдармен жүзеге асырылады:

• мемлекеттік инвестицияларды тікелей басқару;
• салық жеңілдіктерін беру; демеуқаражат, жәрдемқаражат, бюджеттік несие түрінде қаржылай көмек беру;
• тиісті несие саясатын, баға белгіленімін;
• амортизациялық саясат жүргізу;
• нормалар мен стандарттардың қолданылуына, сондай-ақ, міндетті түрде сертификаттау ережесінің орындалуына бақылау жасау.

Қолайлы инвестициялық ахуал жасаудың арқасында:

• жаңа технологияларды, озық техника мен ноу-хауды енгізу;
• ішкі рынокты жоғары сапалы тауарлармен және қызмет көрсетулермен молықтыру;
• отандық тауар өндірушілерді мемлекеттік қолдау және ынталандыру;
• Қазақстан Республикасының шикізат базасын ұтымды әрі кешенді пайдалану;
• менеджмент пен маркетингтің қазіргі әдістерін енгізу; жаңа жұмыс орындарын ашу;
• жергілікті кадрларды оқыту жүйесін енгізу, олардың біліктілік деңгейін көтеру;
• өндірістің қарқынды дамуын қамтамасыз ету;
• қоршаған табиғи ортаны жақсарту міндеттері шешіледі.