Ірі блокты құрылымдар

Ірі блокты құрылымдар – үйлер мен ғимараттардың табиғи не жасанды тастардың ірі блоктарынан құрастырылатын құрама бөліктері. Ол тұрғын, қоғамдық және өнеркәсіптік үйлерді салуда қолданылады. Ірі блоктар арналған мақсатына қарай әр түрлі бетондардан (жеңіл, ауыр, силикат), сондай-ақ кірпіштер мен керамик. тастардан зауыттарда дайындалады. Кейде олар табиғи тастардан да жасалады. Ірі блоктардың массасы 3 т-дан аспайды. Әдетте блоктардан үйдің әр түрлі бөлігі – іргетасы, сыртқы және ішкі қабырғасы, т.б. құрастырылады. Қазіргі құрылыста үйдің сыртқы қабырғасына арналған І. б. қ. кеңінен пайдаланылуда. Оның ірі блоктары көлемдік массасы 1100 – 1600 кг/м3 жеңіл және кеуек бетондардан (шлак бетон, керамзит бетон, газ бетон) дайындалады. Ірі блокты қабырғалардың қалыңд. 30 – 60 см болуы керек. Үйдің ішкі қабырғасына арналған І. б. қ. әдетте ауыр бетоннан (қалынд. 30 – 40 см) дайындалады. І. б. қ. көбіне көп қабатты үйлерді салуда қолданылады.