Айтқұл Шәкенұлы

Айтқұл Шәкенұлы (1855, Жыңғылды ауданы – 1940, Сартөбе) – емші. Тобыштың Тоқабай атасының ұрпағы. Ол барлық өмірін халықтың игілігіне арнап, емшілікпен айналысқан. Айтқұл адамдарды емдеуде Маңғыстау жерінде өсетін емдік шөптер мен жануарлардың майын, етін пайдаланған. Мысалы, адыраспан өсімдігінің кезеңдік өскіндерінен тұнба жасап ішкізіп, суық тигенде оның буына отырғызып емдеген. Сонымен бірге биенің, қойдың іш, бүйрек майларын, сарүйек жыланның етін, оның тастаған түлек қабығын емге жаратқан. Айтқұл емші Сарытөбеде жерленген.