Айқын (газет)

«Айқын» – Қазақстанда таралатын республикалық қоғамдық-саяси газет. Оның алғашқы нөмірі  2004 жылдың 6 наурызында жарық көрген. Республика көлемінде беделі, ықпалы, таралымы жөнінен жетекші орындардың бірінде.

Газеттің алғашқы құрылтайшысы – «Литер-Media» ЖШС. Газет медиа-холдинг құрамында 2009 жылға дейін болды.

2009 жылы Президент әкімшілігінің басшысы Аслан Мусиннің жетекшілігімен өткен кеңесте «Айқын» және «Литер-Media»-ға қарасты «Литер», «Қазақстан теміржолшысы» газеттері «Нұр Отан» партиясының құрылтайшылығымен құрылған «Нұр Медиа» медиа-холдингінің  құрамына өтті.

«Айқын» – «Nur Otan» партиясының негізгі ресми газеті. 2004 жылдан 2018 жылға дейін аптасына 5 рет, 2018 жылдан бері аптасына 4 рет шығып келеді. Газеттің «Айқын-апта» қосымшасы 2019 жылға дейін жарық көрді.

2004-2018 жылдар аралығында Алматы қаласы  Әйтеке би көшесі 79-да  шығып тұрса, 2018 жылдың 7 қазанынан бастап, Астана қаласына қоныс аударды. Қазіргі мекенжайы: Астана қаласы, Қонаев көшесі 12/1.

«Айқын» газеті жазатын негізгі тақырыптар – саясат, экономика, әлеумет, спорт, халықаралық саясат. Газет 2019 жылдың қыркүйек айынан бастап сараптама жанрына ерекше мән беріп, мақалаларды осы стильге көшірді. Қоғамдағы ең өзекті проблемаларды жан-жақты сараптап, зерттеп жазады. Өз саласында мойындалған мамандардан сұхбат алады. Газет тиражы 40 000 дана.

Бас редакторлар

«Айқын» газетін әр жылдары елге белгілі журналист-публицистер басқарды.

2004 -2007 жыл аралығында газеттің бас редакторы  Серік Жанболат болды.

2007-2008 жылдары газетке Бауыржан Омаров редакторлық етті.

2008 жылдан 2019 жылға дейін Нұртөре Жүсіп бас редактор атанды.

2019 жылдың қыркүйегінен бастап газеттің бас редакторы – Нұрмұхамед Байғараев. == Құрылымы == Айқын газеті құрылымдық жағынан Саясат және экономика, Әлеумет және руханият, Интернет-редакция, Аймақтағы тілшілер қосыны болып бөлінеді.

Газеттің Ақмола, Атырау, Жамбыл, Қарағанды, Қызылорда, Түркістан, Солтүстік Қазақстан, Шығыс Қазақстан облыстарында, Алматы және Шымкент қаласында меншікті тілшілері бар.

Жетістіктері

2005 жылы – Президент сыйлығын иемденген.

2006 жылы – «Алтын жұлдыз» сыйлығына ие болған.

2017 жылы – «Үркер» сыйлығын иемденген.

Газет журналистері  ҚР Президенті грантының және «Үркер» сыйлығының, Журналистер Одағы сыйлығының иегерлері, БАҚ саласындағы, мерекелік және басқа да медальдармен, алғысхаттармен марапатталған.  

Сайты

Айқын газетінің Aikyn.kz сайты 2008 жылы іске қосылған.  Басылымның интернет нұсқасының аудиториясы Қытай, Ресей, АҚШ, Франция, Түркия, Моңғолия, Өзбекстан, Қырғыз Республикасын да қамтиды. Сондай-ақ сайтта газеттің PDF-нұсқасына жазылып, оқуға болады. Сайттың 1 тәуліктегі қаралымы 40-60 мың арасында. Liveinternet.ru рейтингінде Қазақстандағы топ-10 медиа сайттың қатарына кіреді.  

Басылым аудиториясы

2021 жылы  мамыр айында Астана қаласындағы Л.Гумилев атындағы Еуразия ұлттық университеті, Журналистика және саясаттану  факультетінде «Айқын» газетінің төл аудиториясы ашылды.