Алтын Орда ханы Ұлығ Мұхаммедтің түрік сұлтаны Мұрад II-ге хаты

Алтын Орда ханы Ұлығ Мұхаммедтің түрік сұлтаны Мұрад II-ге хаты - Жошы ұлысының Осман мемлекетімен қарым-қатынасына бейбіт сипат беруге жасалған талпыныс. Ұлығ-Мұхаммед хан (1419-23 және 1426- 37) 1428 ж. 14 наурызда Днепр өзенінің батысында түрік сұлтанына хат жолдады. Өте қысқа жазылған хатта Ұлығ-Мұхаммед Алтын Орда хандары мен түрік сұлтандарының арасында бұрын байланыстың жақсы болғандығын айта келіп, қазіргі кезде екі ел арасында елшіліктер жіберу мен сауда-саттық жағдай жасау қажеттілігінің туып отыртанын баяндайды. Екі ел арасында саудагерлердің келіп-кетуіне қауіп төндіріп отырған күштерді бірігіп талқандауға ұсыныс жасайды. Хаттың түпнұсқасы Стамбулдағы Топкапы мұрататында сақтаулы. Алғаш рет бұл хатты түрік талымы Акдес Нимет Курат 1940 ж. Стамбулда қазіргі түрік тіліне аударды. 1950-70 ж. хаттағы тарихи мәліметтерді А.Ю.Якубовский, С.Е.Малов, М.Г.Сафаргалиев пайдаланды. Хаттың толық аудармасын, түсініктеме мен қосымшасын орыс тілінде Т.И.Сұлтанов жариялады.