Асқан ет

Асқан ет Қазақша ет асу үшін жылқы еті болсын, қой еті болсын немесе сиыр еті болсын жуылып, салқын су құйылған қазанға тұтас салынады да отты басыңқырап қойып, бабымен қайнатылады. Бір қайнаған соң көбігі алынады да одан әрі ауық – ауық сапырылып қойылады. Сонда көбігі тарайды. Ал еттің бар маңызы сол көбігінде болады. Ет қайнап жатқанда оған салынатын қамыр дайындалады. Ол үшін алдымен еленген ұн шұңғыл ыдысқа салынып, аздап су құйылады да шикі жұмыртқа жарылып, қамыр иленеді. Содан кейін дөңгелектеп, күлше қалпына келтіріледі де әлгі табақ 30 – 40 минут төңкеріліп қойылады. Сонда қамыр көтеріледі. қамыр көтерілді – ау деген кезде оқтаумен жұқалап (1 - 1,5 мм) жазылып, 8х8 сантиметр мөлшерде төртбұрыштан кесіледі.

Тағамға байланысты салт

Бір айта кететін жайт – Қазақстан кең байтақ өлке. Соған орай оның түкпір – түкпіріндегі салт – дәстүр де әр түрлі. Мәселен, Шығыс Қазақстан облысында еттің жайылған наны әлгіндегідей төртбұрыштап кесілмейді. Сорпаға сол жайылған қалпында тұтас салынады. Содан соң піскеннен кейін сол формасын бұзбай табаққа салып әкеп, құрметті қонағына не болмаса от басының үлкеніне кескізеді. Еттің пісуіне 30 минуттай қалғанда қабығы аршылып, жуылған картоп салынады. Картоп та, ет те піскеннен кейін бөлек ыдысқа түсіріліп алынады. Сорпаның беті кесеге қалқып алынып, тұз, сақиналап туралған пияз немесе көк жуа салынады. Бұрышталып, беті жайпақ шағын тарелкамен жабылып, бұқтырылады. Сөйтіп, қазанның астындағы от күшейтіліп, сорпаға манағы дайындалған қамыр салынып пісіріледі. Қамыр қазанға түсісімен бірден қайнап кетуі тиіс. Сонан соң ғана отын басып қояды. Нан піскен соң жайпақ табаққа түсіріліп алынады да, үстіне ет салынып, дастарқанға әкелінеді. Ет дастарқан басында қиялай туралып, үстіне әлгі кесеге бұқтырған тұздық құйылады. Картоп бітеу күйінде табақтың жиектеріне қойылады. Республикамыздың кейбір жерлерінде оны да турайды.