Аэрография

Аэрография — трафаретте аэрографпен (аудармада жеңіл қылқалам - бояуды сығылған ауа арқылы жұқа таратуға арналған құрал) бояу техникасы.

Тушь арқылы ақ қағазға салынған аэрографтық сурет

Қолданылатын құрал

Аэрографтың құрылғысы автомобиль шеберханаларында барлық бояу жұмыстарында кеңінен қолданылатын бүріккіш пистолеттің құрылымына ұқсас. Құрылғы нәзік жұмысқа арналған, салынатын сызықтар мен қолданылатын бояудың минималды қалыңдығына баса назар аударылады.

Аэрография мүмкіндіктері

Басып шығарылған суреттермен салыстырғанда аэрография кеңістіктің тереңдігін және заттардың көлемін толығымен жеткізе алады. Аэрографияны кез-келген нәрсеге қолдануға болады. Бұл бөлменің қабырғалары мен төбелері, автокөлік корпусы, жиектері немесе көлік интерьерінің элементтері, әртүрлі компьютерлік және тұрмыстық техника, жиһаз, ас үй жиынтығы және тағы басқасын қамтиды. Мұның барлығы тәжірибелі шебер үстіне сурет салынатын заттың бетін дұрыс дайындаған кезде ғана мүмкін болады. Аэрографпен салынған суреті бар заттар даралыққа ие болып, өз иесінің қасиеттерін сипаттайды. Аэрография әр түрлі көлемдер, қуыстар немесе қондырмаларға ұқсас жасылынып, имитация ретінде қолданылуы арқылы көліктің визуалды тюнингі ретінде қызмет ете алады. Бұл техниканы көлікке аздап «талғам» беру үшін де, оның бүкіл формасын жаңа түрге келтіру үшін де қолдануға болады.

Chevrolet Lacetti автокөлігінің капотына салынған аэрографтық сурет

Тарихы

Бояу бүріккішіне ұқсас алғашқы құрылғыны 1876 жылы Фрэнсис Эдгар Стэнли патенттеді. Бояу бүріккіш құралының өзін 1879 жылы Эбнер Пилер жасаған. Ол акварельді шашырату үшін осы құрылғыны қолдана бастады және қол жетегі бар компрессор көмегімен бүріккіш пистолетті қолданды. Бұл Эбнер жұмыс істеген зергерлік шеберханадан алынған және қосалқы бөлшектерден құрастырылған керемет құрал еді.

4 жылға созылған әзірлеу жұмыстарынан кейін құрылғының прототипін жасаған американдық өнертапқыш Либерти Уолкап аэрографияға патентті сатып алды. Уолкап өз құрылғысына «Ауа қылқаламы» деген, әйелі ойлап тапқан атауды беріп, патенттеді. Уолкаптың әйелі кейінірек Иллинойс штатында бүкіл әлемнің студенттеріне аэрографияны үйрететін өнер мектебін құрды. 1883 жылы Либерти Уолкаптың Rockford Airbrush деп аталатын еншілес компаниясы құрылды. Компания аэрографиялық әдіспен жасалған өнімдерді жарнамалаумен айналысты. Біртіндеп аэрографияға деген қызығушылық күшейіп, сурет салудың жаңа техникасы жарнама, фотобасылым және полиграфия сияқты салаларға бөлінді.

Кейінгі жылдары автокөлік жарыстарының командалары аэрографиялық техниканы аса жиі қолдана бастады. Автокөліктің үстіне жеңіп алған кубоктардың суреттері, демеушілер туралы мәлімет, автокөліктердің жылдамдығын бейнелейтін жануарлардың бейнелері салынды.

Аэрография түрлері

Аэрографияның негізгі түрлері фон ретінде қолданылатын түстер бойынша ажыратылады. Монохромды аэрография суретті бір немесе бір-біріне қарама-қарсы келетін бірнеше бояулармен салуды қамтиды. Заттың негізгі түсі фон ретінде қолданылады. Көптүсті аэрографияда заттың негізгі түсімен бірге түрлі түсті бояулар қолданылып, сурет салынады.