Ақтөбекүйік-1

Ақтөбекүйік-1 - ортағасырлық қалашық орны. Қоғам аулынан солтүстік-батысқа қарай 15 км жерде. 1970 жылы Отырар археологиялық экспедициясы (жетекші К.Ақышев) зерттеген. Қалашық үш мәдени кабатты қамтитын цитадель, шахристан және рабадтан тұрады. Цитадель шахристанның ортасында орналасқан. Ол қазір табаны 80x30, биіктігі 5,5 м төбе. Шахристан одан сәл төмендеу келген, диаметрі 200 м шамасындағы төбешік, мүнаралары бекініс қабырғасымен қоршал- ған. Шахристанға батыс жоне солтүстік жақтан екі жол түскен. Рабад шахристанның оңтүстік жағында. Ол ежелгі өзен арнасына шоғырланған жалпақ төбешіктер мен алаңқайдан тұрады. Сырланбаған қыш ыдыстар (хум, хумшық, дастарқан, су таситын құмыра, т.б.), сырлы ыдыстар (тостаған, кесе, т.б.) сынықтары көптеп табылған. Алынған материалдарға қарағанда қалашықты халық 8—13 ғасырларда мекен етіп, мал өсірумен және егін егумен айналысқан.